اسلام آباد کے سرینا ہوٹل میں قومی آئی ٹی سیمینار کا انعقاد ہوا، بیرونی سفارتکار اور کاروباری شخصیات بھی پاک فوج کے تعاون سے شروع ہونے والے منصوبے کے سلسلے میں حکومتی اقدامات کے معترف نظر آئے۔
اے آر وائی نیوز کے مطابق منصوبے کے تحت آئی ٹی برآمدات کو بڑھانے اور جدید ٹیکنالوجی کے فروغ کے لیے کام کیا جائے گا، سعودی عرب کی مشہور کمپنی واق واق کے سی ای او نے پاکستانی یوتھ کی آئی ٹی سیکٹر میں قابلیت کو سراہا ہے۔
سمیر جنید نے کہا کہ آئی ٹی سیکٹر میں پاکستانیوں کا بہت تجربہ ہے، پاکستان میں بہت ذہین اور قابل لوگ دیکھے ہیں، سی ای او واق واق کا کہنا تھا کہ پاکستان میں ٹیک پروجیکٹس میں بہت ریسرچ ہورہی ہے۔
ایساشیکا عائشہ نے کہا کہ جاپانی کمپنیوں کی سرمایہ کاری کو ممکن بنانے کے لیے اس قسم کے منصوبے مدد گار ہوں گے۔
جاز کے سی ای او عامر ابراہیم نے کہا کہ ایس آئی ایف سی کے زیراہتمام حالیہ منصوبہ آئی ٹی سیکٹرکی ترقی کا منفرد منصوبہ ہے، پاکستان میں آئی ٹی، ٹیلی کام شعبوں سے کمایا جانے والا سرمایہ ملکی معیشت کو مستحکم کرے گا۔
