لاہور: لاہور ہائیکورٹ نے ڈاکٹرز کو ہڑتال فوری ختم کرنے کا حکم دے دیا۔
تفصیلات کے مطابق ساہیوال اسپتال آتش زدگی واقعے کی جوڈیشل انکوائری کروانے سے متعلق درخواست پر سماعت کرتے ہوئے قائم مقام چیف جسٹس شجاعت علی خان نے اپنے فیصلے میں کہا کہ ڈاکٹرز کو اسپتالوں میں ہونا چاہیے عدالتوں میں نہیں، درخواست ہے اپنی ڈیوٹی کریں۔
عدالت نے کہا ہمیں گارنٹی دیں کہ آپ ہڑتال ختم کریں گے، میں اپنے ڈاکٹرز کی کونسل میں اس مسئلے پر بات کروں گا، پنجاب بڑا صوبہ ہے 12 کروڑ لوگوں کا آپ سے واسطہ پڑتا ہے، ڈاکٹرز اور انجینئرز اس ملک کا اثاثہ ہیں، یہاں کوئی بادشاہت نہیں اور نہ یہ اکبری دور ہے۔
قائم مقام چیف جسٹس نے کہا ڈاکٹرز کو ہر قسم کا تحفظ فراہم کریں گے، عدالت نے ڈاکٹرز کو ترمیم کر کے درخواست دوبارہ دائر کرنے کا حکم دے دیا۔
صدر ینگ ڈاکٹرز ایسوسی ایشن ڈاکٹر شبیر نیازی کے وکیل نوشاب اے خان نے دلائل دیے، درخواست گزار نے عدالت سے استدعا کی کہ ساہیوال واقعے پر تحقیقات کے لیے جوڈیشل انکوائری کمیٹی تشکیل دی جائے، اور واقعے کے بعد محکمہ صحت کے اقدامات غیر قانونی قرار دیے جائیں۔
ادھر ایک اور کیس میں لاہور ہائیکورٹ نے اسپتالوں میں ڈاکٹروں کی ہڑتال کے خلاف درخواست ناقابل سماعت قرار دے کر مسترد کر دی۔
لاہور ہائیکورٹ کے جسٹس شاہد کریم نے شہری مظہر عباس کی درخواست پر سماعت کی، عدالت نے ریمارکس دیے کہ یہ حکومت کا مسئلہ ہے، عدالت کا نہیں۔ درخواست میں کہا گیا کہ عدالت نے اسپتال بند کرنے والے ڈاکٹروں کے خلاف پہلے ہی سخت قانونی کارروائی کا حکم دیا تھا، لیکن اس کے باوجود ینگ ڈاکٹرز کی مسلسل ہڑتال سے مریضوں اور ان کے اہل خانہ کو شدید مشکلات کا سامنا ہے۔
درخواست گزار کے مطابق صحت کا شعبہ لازمی سروس اور انسانی جانوں سے منسلک ہے، جس میں ہڑتال کی کوئی گنجائش نہیں ہے، درخواست میں یہ بتایا گیا کہ ڈاکٹرز کی ہڑتال قوانین اور عدالتی حکم کی سنگین خلاف ورزی ہے، اس لیے ینگ ڈاکٹرز کی ہڑتال ختم کرانے کے احکامات دیے جائیں۔
