امریکا میں 4 سالہ بچی جنگل میں بھٹک گئی، اس کے ساتھ موجود وفادار کتا پولیس کے وہاں پہنچنے اس کی حفاظت کرتا رہا۔
امریکی ریاست الباما کی رہائشی 4 سالہ ویڈی اپنے گھر کے لان سے 70 سالہ آیا کی نظر بچا کر باہر نکلی اور قریب موجود جنگل میں جا کر کھیلنے لگی تاہم اس کے بعد واپسی کا راستہ بھول گئی۔
اگلے دو دن تک بچی کا کوئی سراغ نہ ملا، پولیس اور قانون نافذ کرنے والے دیگر اداروں کے سینکڑوں اہلکار اور رضا کار ڈرونز اور گھوڑوں کی مدد سے اسے تلاش کرتے رہے اور بالآخر 48 گھنٹوں بعد اس تک پہنچ گئے۔
ایک رضا کار کے مطابق وہ کتے کے بھونکنے کی آواز سے اس تک پہنچے تو دیکھا کہ کتا بچی کی حفاظت کے لیے چوکس کھڑا تھا، تاہم لوگوں کی بڑی تعداد اپنی طرف آتا دیکھ کر وہ بھاگ نکلا۔
پولیس کے مطابق بچی کے جسم پر جھاڑیوں سے لگنے والی معمولی خراشیں ہیں، ان کے علاوہ وہ مکمل طور پر محفوظ ہے۔
بچی کی بحفاظت تلاش کے بعد اس کے اہلخانہ نے پولیس اور تمام رضا کاروں کا شکریہ ادا کیا۔ بچی کی دادی کا کہنا ہے کہ ان کا بہادر اور وفادار کتا بھی چند گھنٹوں بعد گھر لوٹ آیا ہے۔
