کراچی: ڈالر مافیا کے سرگرم ہونے کے بعد اوپن مارکیٹ میں روپے کی قدر مسلسل کم ہورہی ہے جس کے باعث ڈالر تاریخ کی بلند ترین سطح پر پہنچ گیا۔
تفصیلات کے مطابق گورنر اسٹیٹ بینک کی بیرونِ ملک موجودگی اور مشیرخزانہ کی بجٹ مصروفیات کے باعث ڈالر مافیا سرگرم ہے جس کی وجہ سے 5 روز کے دوران اوپن مارکیٹ میں ڈالر تین روپے مہنگا ہوگیا۔
کرنسی ڈیلرز کے مطابق این ٹی این کی لازمی شرط کے بعد پراپرٹی پر لگایا جانے والا پیسہ ڈالر مارکیٹ میں آنے لگا جس کے باعث اوپن مارکیٹ میں ڈالر تاریخ کی بلندترین سطح 119.50 روپے پرپہنچ گیا۔
ڈالر کی بڑھتی ہوئی قدر کو روکنے کے لیے فاریکس ایسوسی ایشن آف پاکستان نے اسٹیٹ بینک کے اعلیٰ حکام سے رابطے کے بعد ہنگامی اجلاس طلب کیا جس میں اوپن مارکیٹ میں ڈالر کی ترسیل کا فیصلہ گیا کیا۔
ذرائع کے مطابق روپے کی قدر کو مستحکم اور ڈالر کے بھاؤ نیچے لانے کے لیے دبئی کی ایکسچینج کمپنیز سے ڈالرکی بڑی کھیپ پاکستان منگوائی جائےگی اور ان کمپنیوں کو ٹی ٹی کے عوض ڈالر کیش میں ادا کیے جائیں گے۔
فارکس ایسوسی ایشن کا اجلاس اور فیصلے
فاریکس ایسوسی ایشن کی جانب سے طلب کیے جانے والے اجلاس میں فیصلہ کیا گیا کہ ڈالر کی قیمت یومیہ بنیادوں پر کرنسی ڈیلرز اور اسٹیٹ بینک کی مشاورت کے بعد طے کی جائے گی اور اس کی قیمت کو دن میں 3 بار مقرر کیا جائے گا۔
اجلاس میں یہ بھی فیصلہ کیا گیا کہ فاریکس ایسوسی ایشن ڈالرکی قیمت صبح 10بجے،دوپہر2بجےاورشام 4بجےطے کرے گا، اوپن مارکیٹ میں کل ڈالرکی قیمت 70 پیسےکم طےہوگی جس کے بعد کل ڈالرکاریٹ 118روپے70پیسےتک ہوگا، اجلاس میں یہ بھی فیصلہ کیا گیا کہ فاریکس ایسوسی ایشن کے احکامات کی خلاف ورزی کرنےوالےکرنسی ڈیلرزپرجرمانہ عائد کیا جائے گا۔
