کراچی : گورنرسندھ کامران ٹیسوری نے دعویٰ کیا ہے کہ ڈالر مزید 10 سے 15 روپے سستا ہوگا اور اسمگلنگ کے خلاف کریک ڈاؤن جاری رہے گا۔
تفصیلات کے مطابق گورنر سندھ کامران ٹیسوری نے میڈیا سے گفتگو کرتے ہوئے کہا کہ کراچی کے ساتھ کئی دہائیوں سے جاری ظلم کی مثال پورے ملک میں نہیں ملتی ، کراچی کو کوئی دیکھنے والا نہیں ہے۔
کامران ٹیسوری کا کہنا تھا کہ آرمی چیف سے ملاقات کے بعد ڈالر کی قدر کم ہونا شروع ہوئی، ڈالر مزید 10 سے 15 روپے سستا ہوگا۔
گورنر سندھ نے کہا کہ حکومت اور آرمی چیف نے معاشی دہشت گردی کے خاتمے کا فیصلہ کرلیا ہے ، اسمگلنگ کے خلاف کریک ڈاؤن جاری رہے گا۔
پی آئی اے کے حوالے سے انھوں نے بتایا کہ پی آئی اے نقصان کے سوا کچھ نہیں دے رہا ،پی آئی اے کی نجکاری آئندہ 3ہفتوں میں ہوجائےگی، نقصان میں چلنے والے تمام اداروں کی نجکاری ہوگی۔
کامران ٹیسوری کا سرمایہ کاری سے متعلق کہنا تھا کہ خلیجی ممالک سے بہت جلد سرمایہ کاری شروع ہوجائے گی اور غیرقانونی تارکین وطن کو واپس بھیجا جائے گا، 10،10سال سے تعطل کے شکار مسائل پر اب فیصلے ہوں گے۔
انھوں نے تجویز دی کہ آئی پی پیز کا مسئلہ حل کرنے کے لئے سفارتکاروں سے بات ہوسکتی ہے ، امید ہے نگران وزیراعظم 300 یونٹس تک ریلیف دیں گے۔
گورنر سندھ کا مزید کہنا تھا کہ وفاقی وزرا 10 دن میں ایک بار کراچی کا دورہ کریں گے ، معیشت کا حب کراچی ہے وفاقی وزرا کو بھی کراچی میں نظر آنا چاہیے۔
