واشنگٹن: ڈونلڈ ٹرمپ نے انتخابی طریقہ کار تبدیل کرنے کا اعلان کر دیا ہے۔
نیوز ویک کے مطابق نو منتخب صدر ڈونلڈ ٹرمپ نے امریکی انتخابات کے انعقاد کے طریقے کو تبدیل کرنے کے لیے ایک بڑے منصوبے کا اعلان کیا ہے۔
78 سالہ ٹرمپ کو جمعرات کو فاکس نیشن کے زیر اہتمام لانگ آئی لینڈ کی تقریب میں ’’پیٹریاٹ آف دی ایئر‘‘ ایوارڈ دیا گیا، اس تقریب میں امریکی گلوکار لی گرین ووڈ کے گانے ’’گاڈ بلیس دی یو ایس اے‘‘ کی لائیو پرفارمنس دی، ٹرمپ کو دیا گیا ایوارڈ امریکی پرچم کی شکل میں ڈیزائن کیا گیا تھا۔ اس تقریب میں انھوں نے خطاب میں کہا ’’ہمیں اس ملک میں چیزوں کو سیدھا کرنے کی ضرورت ہے، بشمول انتخابات۔‘‘
ٹرمپ نے کہا انتخابات کے طریقہ کار کو بدلنے کی طویل عرصے سے ضرورت تھی، ہم کاغذی بیلٹ اور صرف ایک دن کی ووٹنگ چاہتے ہیں، اور پولنگ اسٹیشن پر ووٹر آئی ڈی اور شہریت کا ثبوت لازمی دینا ہوگا۔
ٹرمپ نے کیلیفورنیا میں ووٹر آئی ڈی پوچھنے کی ممانعت کے حالیہ منظور کیے گئے قانون کی مذمت کی، اور کہا ’’کیلیفورنیا میں انھوں نے ابھی ایک قانون پاس کیا ہے کہ آپ کو ووٹر سے ووٹر آئی ڈی مانگنے کی بھی اجازت نہیں ہے، ذرا سوچیں کہ اگر آپ کسی ووٹر سے اس کی ووٹر آئی ڈی مانگتے ہیں تو آپ جرم کا ارتکاب کرتے ہیں، آپ کو سزا ملے گی، غرض ہمیں پورا ملک سیدھا کرنا ہوگا۔‘‘
یہ پہلا موقع نہیں ہے جب ڈونلڈ ٹرمپ نے انتخابات میں تبدیلی کی تجویز پیش کی ہو۔ جونسٹاؤن، پنسلوینیا میں اگست میں ایک تقریر کے دوران انھوں نے اسی دن ووٹنگ اور ووٹر آئی ڈی قوانین کے حق میں میل ان بیلٹ سے چھٹکارا حاصل کرنے کی تجویز پیش کی تھی۔
شام میں جو ہورہا ہے اسے چلنے دیں امریکا کا کوئی لینا دینا نہیں، ٹرمپ
امریکا میں 98 فی صد کاؤنٹیز کاغذی بیلٹ استعمال کرتی ہیں لیکن برینن سینٹر کے مطابق کرونا وبا کے بعد سے امریکا نے انتخابات کے کام کرنے کے طریقے میں بڑی تبدیلیاں کیں، اب پہلے کے مقابلے میں زیادہ لوگ ارلی ووٹ یا ڈاک کے ذریعے ووٹ ڈالتے ہیں، رواں برس 2024 میں، قومی سطح پر سوا 8 کروڑ امریکیوں نے میل کے ذریعے اور ارلی ووٹ ڈالے۔ تاہم دوسری طرف ووٹر آئی ڈی کی ضرورت کے قوانین میں بھی اضافہ ہو رہا ہے، 8 ریاستیں 2020 سے ووٹر آئی ڈی کے قوانین نافذ کر رہی ہیں۔
