واشنگٹن: امریکی صدر ڈونلڈ ٹرمپ نے چین اور ایران پر اقتصادی پابندیوں کے بعد یورپی یونین کی درآمدی اشیا پر اضافی ٹیکس عائد کرنے کی دھمکی دے دی۔
غیرملکی خبررساں ادارے کے مطابق جی 20 سمٹ کے دوران چین اور امریکا کے درمیان تجارتی جنگ کے خاتمے کے فضا ہموار ہوئی تھی کہ ڈونلڈ ٹرمپ نے یورپی یونین کی درآمدی اشیا پر 4 ارب ڈالر کے اضافی ٹیکس عائد کرنے کی دھمکی دے دی۔
امریکی صدر کے ممکنہ فیصلے سے باخبر رہنے والے یورپی یونین نے پہلے ہی امریکا کو خبردار کرتے ہوئے کہا تھا کہ اگر امریکا کی جانب سے ٹیکس عائد کرنے کی کوشش کی گئی تو یورپی یونین کے ممالک بھی جوابی کارروائی کرنے پر مجبور ہوجائیں گے۔
امریکی تجارتی نمائندے رابرٹ لائٹرز نے یورپی یونین کی مصنوعات کی تفصیلات بتاتے ہوئے اعلان کیا کہ صدر ٹرمپ کی ہدایت پر درآمدی اشیا پر 4 ارب ڈالر کے اضافی ٹیکس عائد کیے جائیں گے۔
مزید پڑھیں: ایران آگ سے کھیل رہا ہے، ٹرمپ کا روحانی حکومت کو نیا انتباہ
واضح رہے کہ امریکی صدر نے اقتدار سنبھالنے کے بعد سے ایران پر اقتصادی پابندیاں عائد کی تھیں اس کے بعد چین اور امریکا نے ایک دوسرے کی اشیا پر اضافی ٹیکس عائد کیے تھے۔
خیال رہے کہ اس سے قبل امریکی صدر کا اپنے بیان میں کہنا تھا کہ ایران آگ سے کھیل رہا ہے، زیادہ سے زیادہ دباؤ بڑھانے کی پالیسی جاری رکھی جائے گی۔
یاد رہے کہ امریکی وزارت خارجہ نے ایک بیان میں کہا تھا کہ ایران کو کسی بھی سطح پر یورینیم کی افزودگی کی اجازت دینا ایک غلطی تھی، برطانیہ اور جرمنی ایران سے مطالبہ کر چکے ہیں کہ وہ اپنا یہ فیصلہ واپس لے۔
