آج کل بچوں کی اسکولوں کی چھٹیاں ہیں جبکہ لاک ڈاؤن کے باعث ہوٹلنگ کا لطف بھی نہیں اٹھایا جاسکتا، ایسے میں گھر میں ہی ریستوران جیسا مزیدار سا کھانا بنا کر بچوں کو خوش کیا جاسکتا ہے۔
اے آر وائی ڈیجیٹل کے مارننگ شو گڈ مارننگ پاکستان میں مزیدار ڈریگن چکن بنانے کی ترکیب بتائی گئی۔ ڈریگن چکن بنانے کے لیے مندرجہ ذیل اشیا کی ضرورت ہوگی۔
اجزا
چکن: آدھا کلو، اسٹرپس میں کٹی ہوئی
کارن فلور: ایک چوتھائی کپ
انڈے کی سفیدی: 1 عدد
سویا سوس: 2 چائے کے چمچ
پسی کالی مرچ: چوتھائی چائے کا چمچ
نمک: حسب ذائقہ
تیل: تلنے کے لیے
سوس بنانے کے لیے
تیل: 2 کھانے کے چمچ
پسی لال مرچ: 1 سے ڈیڑھ چائے کا چمچ
پسا لہسن: 2 چائے کے چمچ
پسا ادرک: 1 چائے کا چمچ
ٹوماٹو کیچپ: چوتھائی کپ
یخنی: چوتھائی کپ
ٹماٹر کا پیسٹ: 2 کھانے کے چمچ
ریڈ چلی سوس: 1 کھانے کا چمچ
نمک: حسب ذائقہ
کٹی ہوئی ہری پیاز: 2 سے 3 کھانے کے چمچ
ترکیب
ایک پیالے میں چکن لے کر اس میں کارن فلور، انڈے کی سفیدی، سویا سوس، کالی مرچ اور نمک ڈال کر اچھی طرح مکس کرلیں اور 30 منٹ کے لیے رکھ دیں۔
فرائی پین میں تیل گرم کریں اور میری نیٹ کی ہوئی چکن ڈال کر ہلکا سنہری ہونے تک فرائی کرلیں۔
سوس کے لیے
کڑاہی میں تیل گرم کریں، سرخ مرچ پاؤڈر، لہسن اور ادرک ڈال کر سنہری ہونے دیں۔
ٹوماٹو کیچپ، یخنی، ٹماٹر پیسٹ، ریڈ چلی ساس، نمک اور سویا ساس ڈالیں اور گاڑھا ہونے تک پکائیں۔
بعد میں اس میں چکن اور ہری پیاز ڈال کر مکس کریں اور اوپر سے تل ڈال کر فرائیڈ رائس کے ساتھ گرما گرم سرو کریں۔
