اسلام آباد: جسمانی دردوں کی غیر معیاری دوا کے مارکیٹ میں فروخت کا انکشاف ہوا ہے، ڈریپ نے درد کے علاج کی دوا کے تین بیچز غیر معیاری قرار دے دیے۔
تفصیلات کے مطابق ڈرگ ریگولیٹری اتھارٹی سے ڈولر ڈی ایس سیرپ کا پراڈکٹ ری کال الرٹ جاری ہوا ہے، سنٹرل ڈرگ لیب کراچی نے ڈولر ڈی ایس کے تین بیچ غیر معیاری قرار دیے ہیں۔
ڈریپ کا کہنا ہے کہ ڈولر ڈی ایس میفینیمک ایسڈ سے تیار کردہ جسمانی درد کے علاج کی دوا ہے، جس کے بیچ 1236، 1237، 1238 غیر معیاری قرار پائے ہیں، سیرپ میں سوڈیم سائٹریٹ کی مطلوبہ مقدار شامل نہیں ہے۔
ڈریپ نے خبردار کیا ہے کہ غیر معیاری ڈولر ڈی ایس سسپنشن کا استعمال ری ایکشن کر سکتا ہے، بخار، جسم درد، شدید کمزوری لا حق ہو سکتی ہے، گلے کی سوجن اور آنکھوں میں تکلیف ہو سکتی ہے، جسم پر دھبے اور زخم بھی بن سکتے ہیں۔
ڈولور ڈی ایس سسپنشن سیرپ آدم جی فارما کراچی کا تیار کردہ ہے، کمپنی کو ڈولر سیرپ کے متاثرہ بیچز مارکیٹ سپلائی نہ کرنے کی ہدایت کر دی گئی ہے، ڈریپ نے کمپنی کو ڈولر سیرپ کے متاثرہ بیچز مارکیٹ سے اٹھانے کی ہدایت بھی کی ہے۔
فارمیسیوں کو ہدایت کی گئی ہے کہ وہ ڈولر سیرپ کے متاثرہ بیچز کی سیل روکنے کے لیے اسٹاک چیک کریں، کیمسٹ بھی متاثرہ بیچز فارما کمپنی کو واپس بھجوائیں، اور ڈاکٹر مریضوں کو ڈولر ڈی ایس سیرپ کے متاثرہ بیچ استعمال نہ کرائیں۔
