اسلام آباد: ڈرگ ریگولیٹری اتھارٹی آف پاکستان (ڈریپ) نے شہریوں کو خبردار کیا ہے کہ مارکیٹس میں کتے کے کاٹنے کی مشتبہ و جعلی ویکسین کی ہرگز نہ خریدیں۔
تفصیلات کے مطابق مارکیٹس میں کتے کاٹے کی مشتبہ و جعلی ویکسین کی دستیابی کے انکشاف کے بعد ڈریپ نے جعلی اینٹی ریبیز ویکسین کا پروڈکٹ ری کال الرٹ جاری کردیا۔
ڈریپ کی جانب سے جاری کردہ الرٹ میں کہا گیا کہ مارکیٹ میں مشتبہ اینٹی ریبیز ویکسین سپلائی کی اطلاع ملی ہے، شور ریب نامی مشتبہ اینٹی ریبیز ویکسین بھارتی کمپنی کی تیار کردہ ہے۔
ڈریپ کا کہنا ہے کہ شور ریب نامی مشتبہ اینٹی ریبیز ویکسین ڈریپ کے پاس رجسٹرڈ نہیں ہے، مارکیٹ میں دستیاب مشتبہ اینٹی ریبیز ویکسین کا بیچ آر او10821 ہے۔
اینٹی ریبیز ویکسین کتے کے کاٹنے کا شکار افراد کو لگائی جاتی ہے، اس ویکسین کا استعمال انسانی صحت کیلئے سنگین خطرہ بن سکتی ہے، غیر رجسٹرڈ اینٹی ریبیز ویکسین کی کوالٹی اور سیفٹی غیر واضح ہے یہ ویکسین کتے کاٹنے کے انفیکشن میں اضافہ کر سکتی ہے۔
ڈریپ الرٹ میں کہا گیا کہ ڈریپ کی ریگولیٹری فیلڈ فورس میڈیسن مارکیٹ کی سرویلنس کریں اور اس جعلی اینٹی ریبیز ویکسین کی سپلائی چین کی جامع تحقیقات کی جائیں، مارکیٹ میں دستیاب جعلی اینٹی ریبیز ویکسین کے بیچ کو تحویل میں لیا جائے۔
ڈریپ نے جاری کردہ الرٹ میں کہا کہ ادویات کے ڈسٹری بیوٹرز، فارمیسز دستیاب ادویات کا اسٹاک چیک کریں اور ڈاکٹرز سگ گزیدگی کا شکار افراد کو شور ریپ اینٹی ریبیز استعمال نہ کرائیں۔
