اسلام آباد: ڈریپ نے غیر معیاری ادویات کی تیاری پر ایبٹ آباد اور سوات میں قائم 2 فارما کمپنیوں کے لائسنس کینسل کر دیے۔
تفصیلات کے مطابق ڈرگ ریگولیٹری اتھارٹی نے غیر معیاری ادویہ ساز کمپنیوں کے خلاف بڑا ایکشن لے لیا، ذرائع کا کہنا ہے کہ ہومیو، ہربل اور نیوٹراسوٹیکل ادویہ ساز 2 کمپنیوں کے لائسنس کینسل کر دیے گئے ہیں۔
ڈریپ ذرائع کے مطابق کونویل لیبارٹریز اور ویلکنز فارما کے پیداواری اور درآمدی لائسنس کینسل کیے گئے ہیں، یہ کمپنیاں غیر معیاری ادویات کی تیاری میں ملوث پائی گئی تھیں، لائسنس منسوخی سے قبل ان کمپنیوں کو دفاع کا موقع بھی فراہم کیا گیا۔
ڈریپ نے مذکورہ کمپنیوں کو ادویہ سازی و ترسیل فوری روکنے اور ادویہ سازی کے لائسنس واپس جمع کرانے کی ہدایت کر دی۔
دوا ساز کمپنیاں ایبٹ آباد اور سوات میں قائم تھیں، یہ کمپنیاں ’گڈ مینوفیکچرنگ پریکٹسز‘ کے معیار پر پورا نہیں اتریں، اور لائسنس ڈریپ پشاور کی رپورٹ کی روشنی میں کینسل کیے گئے ہیں۔
ذرائع کا کہنا ہے کہ ڈریپ انلسٹمنٹ ایویلوایشن کمیٹی نے لائسنس منسوخی کی سفارش کی تھی، ای ای سی میں کمپنیوں کے بارے میں ڈریپ پشاور کی رپورٹ پر غور کیا گیا تھا، خفیہ اطلاع پر کمپنیوں کے پیداواری یونٹس کی انسپکشن بھی کی گئی تھی۔ ڈریپ کا کہنا ہے کہ کمپنیوں کے لائسنس صحت عامہ کے مفاد میں کینسل کیے گئے ہیں، یہ کمپنیاں ڈریپ ایکٹ 2012 کی خلاف ورزی کی مرتکب پائی گئیں۔
ذرائع کے مطابق کونویل لیبارٹریز کیپسول، گولی، سیرپ، سسپنشن، ساشے تیار کرتی تھی، اس کمپنی کے پیداواری یونٹس زمین بوس ہو چکے تھے، اور ادویات کی تیاری ایک خستہ حال ماحول میں جاری تھی، کونویل لیبارٹریز نے ڈریپ کے کوالٹی و سیفٹی قواعد کی خلاف ورزی کی۔
ویلکنز فارما بھی غیر معیاری ادویات کی تیاری کی مرتکب پائی گئی تھی، کمپنی اسٹاف کی غیر موجودگی میں ادویات تیار کر رہی تھی، ویلکنز فارما بھی کوالٹی و سیفٹی کنٹرول قواعد کی خلاف ورزی کی مرتکب پائی گئی۔
ذرائع نے بتایا کہ ڈریپ انلسٹمنٹ ایویلوایشن کمیٹی میں ان کمپنیوں کی طرف سے کوئی پیش نہیں ہوا۔
