اسلام آباد : ڈرگ ریگولیٹری اتھارٹی آف پاکستان (ڈریپ) نے وینٹی لیٹرز کی تیاری کیلئے دوسری کمپنی کے ڈیزائن کی منظوری دے دی، فواد چوہدری نے ایلسنز وینٹ کو مبارکباد پیش کی۔
تفصیلات کے مطابق وفاقی وزیرِ سائنس و ٹیکنالوجی فواد چوہدری نے سماجی رابطے کی ویب سائٹ ٹوئٹر پر اپنے پیغام میں کہا کہ ڈرگ ریگولیٹری اتھارٹی آف پاکستان (ڈریپ) نے دوسری کمپنی کو وینٹیلیٹروں کی تیاری کے لئے منظوری دے دی ہے ، کراچی کی کمپنی ایلسنز وینٹ کے ڈیزائن کو وینٹی لیٹرز کی صنعتی بنیادوں پر پیداوار کے لیے منظور کیا گیا ہے، اگر ایک اور پیداواری لائن منظور ہوئی تو پاکستان وینٹی لیٹرز برآمد کرنے کی اجازت دے دے گا، آلسنز کو مبارکباد پیش کرتا ہوں۔
DRAP has approved second company for production of Ventilators, Alsons from Karachi design is approved for commercial production of Vents,one more production line and Pak ll allow export of Ventillators….. Congs Alsons (In Picture: Alsons Ventillator) pic.twitter.com/PHbDuUIzSz
— Ch Fawad Hussain (@fawadchaudhry) September 2, 2020
خیال رہے پاکستان میں جدید طرز کے مقامی وینٹی لیٹرز کی تیاری میں وزارت سائنس اینڈ ٹیکنالوجی اور این آر ٹی سی نے زبردست کارنامہ انجام دیا اور پہلی بار ” میڈ ان پاکستان” وینٹی لیٹرز تیار کئے۔
این آر ٹی سی پاکستان کا پہلا اداراہ ہے، جو مقامی سطح پر وینٹی لیٹرز بنا رہا ہے، یہ وینٹی لیٹرز آسانی سے ایک جگہ سے دوسری جگہ منتقل کیے جا سکتے ہیں اور انھیں سیف ایونٹ ایس پی 100 (Safevent SP 100) کا نام دیا گیا ہے، اس پیداواری یونٹ میں ہر ماہ ڈھائی سو سے 300 تک وینٹی لیٹرز تیار کرنے کی صلاحیت ہے۔
بعد ازاں وزیر اعظم عمران خان نے این آر ٹی سی کی جانب سے وینٹی لیٹر کی تیاری کو سراہتے ہوئے کہا کہ یہ پاکستان کے لئے ایک اہم کامیابی ہے، حکومت نوجوانوں کی صلاحیتوں کوبروئے کارلانے کیلئے ہر اقدام کی حمایت کرے گی۔
یاد رہے کورونا کے دوران پاکستان میں وینٹی لیٹرز کی کمی کے باعث امریکی حکومت نے پاکستان کو مجموعی طور پر 200 وینٹی لیٹرز عطیہ کیے ہیں۔
