The news is by your side.

ڈریپ کا کراچی پورٹ قاسم میں جعلی ادویہ ساز کمپنی پر چھاپہ ، بھاری مقدار میں غیر قانونی ادویات برآمد

کراچی : ڈریپ نے کراچی پورٹ قاسم میں جعلی ادویہ ساز کمپنی پر چھاپہ مار کر غیر قانونی ادویات کی بھاری مقدار برآمد کرلی اور فیکٹری کو سیل کردیا۔

تفصیلات کے مطابق ڈرگ ریگولیٹری اتھارٹی کا جعلی اور غیر معیاری ادویات کی روک تھام کیلئے ملک گیر کریک ڈاون جاری ہے۔

ڈریپ نے کراچی پورٹ قاسم میں جعلی ادویہ ساز کمپنی پر چھاپہ مارا ، تکنیکی ٹیم کے بغیر تیارکردہ غیر قانونی ادویات کی بھاری مقدار برآمد کرکے فیکٹری سیل کردی۔

وزارت قومی صحت کے ترجمان نے بتایا کہ ڈرگ ریگولیٹری اتھارٹی سندھ کے حکام نے صوبائی ڈرگ کنٹرول ڈیپارٹمنٹ کے ہمراہ کراچی کے علاقے پورٹ قاسم میں دوا ساز کمپنی پر چھاپہ مارا۔

ترجمان کا کہنا تھا کہ فیکٹری میں صفائی کی نا مناسب صورتحال کے دوران غیر تکنیکی ٹیم اور مائیکروبیالوجی لیبارٹریز کے بغیر جعلی، غیر رجسٹرڈ ادویات کی تیاری جاری تھی۔

وزارت صحت کے مطابق دوا ساز کمپنی کے خلاف کارروائی ڈریپ کے ہیلتھ اینڈ او ٹی سی رولز کے تحت کی گئی ہے۔

ڈریپ حکام کی جانب سے فیکٹری انتظامیہ کے خلاف ادویات کے تیارشدہ مشتبہ اسٹاک کو اٹھائیس دنوں کیلئے ضائع نہ کرنے کو حکم دیتے ہوئے پیداواری سرگرمیاں روکنے کا حکم دے دیا۔

سی ای او ڈریپ ڈاکٹر عاصم روف نے کہا کہ فیکٹری انتظامیہ کے خلاف ڈریپ ایکٹ کے تحت کارروائی کا آغاز کر دیا گیا ہے۔

انکا کہنا تھا کہ غیر قانونی ،جعلی اور غیر معیاری ادویات کی روک تھام کیلئے ملک بھر میں ڈسٹری بیوٹرز فارمیسیز اور میڈیکل سٹورز پر چھاپے مارے جا رہے ہیں، جعلی ادویات میں ملوث مافیاز کے خلاف ڈریپ ایکٹ کے تحت کارروائیاں جاری رہیں گی۔

وفاقی وزیر صحت عبدالقادر پٹیل ننے بتایا کہ حکومت جعلی اور غیر قانونی ادویات کے خاتمے کیلئے پرعزم ہے، ڈریپ کو ہدایت کی ہے کہ شہریوں کیلئے معیاری اور سستی ادویات کی دستیابی یقینی بنانے کیلئے ہرممکن اقدامات جاری ہیں۔

Comments

یہ بھی پڑھیں