اسلام آباد : ڈرگ ریگولیٹری اتھارٹی نے ایکشن لیتے ہوئے 12 لوکل دوا ساز کمپنیوں کے لائسنس معطل اور 5 فارما کمپنیوں کے لائسنس کینسل کردیئے ، کمپنیز غیر معیاری دوا سازی کی مرتکب پائی گئیں۔
تفصیلات کے مطابق ڈرگ ریگولیٹری اتھارٹی نے غیر معیاری دوا ساز کمپنیز کے خلاف بڑا ایکشن کرتے ہوئے 12 لوکل دوا ساز کمپنیز کے لائسنس معطل کردیئے۔
ذرائع کا کہنا ہے کہ ڈرگ ریگولیٹری اتھارٹی نے سندھ کی پانچ، بلوچستان کی ایک ، خیبرپختونخوا کی 5، اسلام آباد ایک دواساز کمپنیوں کے لائسنس معطل کئے جبکہ پنجاب کی 2، سندھ کی2 اور اسلام آباد کی1 فارما کمپنی کا لائسنس کینسل کیا۔
ذرائع کے مطابق دوا ساز کمپنیز کے خلاف ایکشن ڈریپ ایکٹ 2012 کے تحت لیا گیا۔
سی ای او ڈریپ ڈاکٹر عاصم رؤف نے فارما کمپنیز کے خلاف کارروائی کی تصدیق کرتے ہوئے کہا دوا ساز کمپنیز نے گڈ مینوفیکچرنگ پریکٹس کی خلاف ورزی کی، دواساز کمپنیز کے خلاف کارروائی فیلڈ ٹیمز کی سفارش پر کی اور انسپکشن میں کمپنیز غیر معیاری دوا سازی کی مرتکب پائی گئیں۔
ڈاکٹر عاصم رؤف کا کہنا تھا کہ ملک میں عالمی معیار کی دواسازی، دستیابی اولین ترجیح ہے، ڈریپ ایکٹ کی خلاف ورزی کرنے والوں سے سختی سے نمٹا جائے گا اور غیر معیاری ادویات کے خلاف ملک گیر آپریشن جاری رہے گا۔
