عدالتی حکم پر دعا زہرا کو لاہور سے کراچی منتقل کر دیا گیا۔
گزشتہ روز لاہور کی مقامی عدالت نے دعا زہرا کو کراچی بھیجنے کا حکم دیا تھا۔ دعا زہرا کو چائلڈپروٹیکشن بیورو میں رکھا گیا ہے۔
دعا زہرا کو یکم اگست کو متعلقہ ٹرائل کورٹ میں پیش کیاجائےگا۔ چائلڈ پروٹیکشن بیورو کا کہنا ہے کہ دعا زہرا کو فل پروف سیکیورٹی اور حفاظتی انتظامات میں رکھا گیا ہے۔
جوڈیشل مجسٹریٹ رضوان احمد کی عدالت نے دعا زہرا کو کراچی بھیجنے کا حکم دیا تھا۔ مدعی مقدمہ مہدی کاظمی کے وکلا احمد شیر اور فہد صدیقی عدالت میں پیش ہوئے اور عمر کے تعین کے لیے تیسرے میڈیکل ٹیسٹ کی درخواست پرمدعی کے وکیل نے اعتراض کیا۔
وکیل احمد شیر جٹ کا کہنا تھا کہ ہائیکورٹ کا ڈویژن بنچ اس پر فیصلہ دے چکا ہے لہٰذا یہ اس عدالت کا دائرہ اختیار نہیں ہے۔
ندھ ہائی کورٹ نے دعا زہرا کو شیلٹر ہوم کراچی منتقل کرنے کا فیصلہ دیتے ہوئے کہا تھا کہ دعا کو کراچی منتقل کرنے میں کوئی قانونی رکاوٹ نہیں۔
فیصلے میں کہا گیا تھا کہ مذکورہ کیس کراچی کی ٹرائل کورٹ میں زیر التوا ہے اور دعا زہرا کیس کا مرکزی کردار ہے اس کی کراچی میں موجودگی ضروری ہے۔
عدالت نے اپنی آبزرویشن میں کہا تھا کہ بظاہر دعا زہرا اپنے شوہرکے ساتھ بھی ناخوش ہے اور ساتھ رہنا نہیں چاہتی جبکہ وہ والدین سے بھی خوفزدہ ہے اس لیے اس کا شیلٹر ہوم میں رہنا مناسب ہے۔
سندھ ہائی کورٹ نے اپنے حکم نامے میں کہا تھا کہ دعا زہرا کےاغوا سے متعلق ٹرائل کورٹ ہی حتمی فیصلہ کرے گی۔
