شوہر کا موبائل چیک کرنے والی بیوی کو تین ماہ قید کی سزا -
The news is by your side.

Advertisement

شوہر کا موبائل چیک کرنے والی بیوی کو تین ماہ قید کی سزا

دبئی: متحدہ عرب امارات کی عدالت نے شوہر کا موبائل بلا اجازت چیک کرنے پر بیوی کو تین ماہ قید کی سزا سنادی۔

عرب میڈیا کے مطابق دبئی کے شہری راس الخیمہ نے عدالت میں درخواست دائر کی تھی کہ جب وہ نیند میں ہوتا ہے تو اُس کی بیوی خاموشی سے موبائل اٹھا کر اس میں گھس جاتی ہے۔

درخواست گزار نے عدالت کو بتایا کہ اُس نے اپنی بیوی کو سختی سے منع کیا مگر اس کے باوجود اہلیہ نے موبائل فون کی تصاویر اور پیغامات نہ صرف دیکھے بلکہ بعض ذاتی معلومات بچوں کو بھی ارسال کیں۔

مزید پڑھیں: لاہور: دوسری شادی کرنے والے شوہر کو 6 ماہ کی قید

خاتون کے وکیل نے عدالت کو آگاہ کیاکہ میری مؤکلہ کے شوہر نے خود ہی اسمارٹ فون کا پاس ورڈ دیتے ہوئے اسے استعمال کرنے کی اجازت دی۔

ملزمہ کے وکیل نے عدالت کو یہ بھی بتایا کہ راس الخیمہ کو میری مؤکلہ نے دوسری خاتون کے ساتھ بات کرتے ہوئے رنگے ہاتھوں بھی پکڑا ہے جس کے بعد دونوں فریقین نے اپنے موبائل پاس ورڈ ایک دوسرے کو دیے تھے تاکہ شکوک و شبہات ختم ہوجائیں۔

راس الخیمہ نے عدالت سے استدعا کی تھی کہ ملکی قوانین کے تحت میری اہلیہ ذاتی معلومات تک نہ صرف رسائی حاصل کرتی ہے بلکہ مداخلت بھی کرتی ہے لہذا معزز جج اس پر فیصلہ سنائیں۔

یہ بھی پڑھیں: تصویر پر لائیک کیوں آیا؟ شوہر کا بیوی پر بہیمانہ تشدد

عدالت نے سماعت مکمل ہونے پر فیصلہ سناتے ہوئے ملزمہ کو تین ماہ تک قید کرنے کا حکم دیا۔ جج کاکہنا تھا کہ قانون کے تحت میاں بیوی یا کسی بھی دو فریقین کو ایک دوسرے پر شک بھی ہے تو وہ بغیر اجازت ایک دوسرے کا موبائل چیک نہیں کرسکتے، قانون کی خلاف ورزی پر ملزمہ کو سزا دی گئی۔

Comments

comments

یہ بھی پڑھیں