دبئی: پولیس نے عوام کو میجک پین کے استعمال سے خبردار کرتے ہوئے اپیل کی ہے کہ وہ دوسروں کے لکھے ہوئے چیک پر دستخط نہ کریں۔
تفصیلات کے مطابق دبئی پولیس کی جانب سے عوام کو ایک تنبیہ جاری کی گئی ہے جس میں کہا گیا ہے کہ وہ ان چیکس پر دستخط سے گریز کریں، جس پر رقم سمیت دیگر تمام تفصیلات انھوں نے خود نہ لکھی ہوں، بلکہ کسی اور نے چیک بھرا ہو۔
دبئی پولیس کے مطابق میجک پین کا استعمال کر کے لوگوں کو لوٹا جا رہا ہے، اس میجک پین میں مٹنے والی سیاہی کا استعمال کیا جاتا ہے، جس کی وجہ سے دستخط کے بعد رقم اور دیگر تفصیلات تبدیل کی جا سکتی ہیں۔
دبئی میں اب تک ایسے 20 کیسز سامنے آ چکے ہیں جس میں میجک پین کے استعمال کے ذریعے لوگوں کو ان کی رقوم سے محروم کیا گیا۔
پولیس کے مطابق میجک پین کا استعمال غیر قانونی ہے، اس میں ایک سیاہی استعمال ہوتی ہے جو 20 منٹ سے 2 گھنٹے کے اندر مٹ جاتی ہے۔ اسے مختلف قسم کے لین دین جیسا کہ کاروں اور دیگر اشیا کی خریداری یا قرضوں کی ادائیگی کے لیے استعمال کیا جا رہا ہے۔
دبئی پولیس کے ایک افسر لیفیننٹ کرنل ڈاکٹر علی خلیفہ الفلاسی نے بتایا کہ 2020 میں میجک پین فراڈ کے متعدد کیسز میں چیکس لاکھوں درہم مالیت پر مشتمل تھے۔
ان کا کہنا تھا کہ جدید ٹیکنالوجی کے حامل ماہرین نے چیک پر دستخط اور دیگر تفصیلات کی تصدیق کر کے دھوکا دہی کا پتا لگایا، اس لیے لوگ چیک یا دستاویزات پر دستخط کے وقت اپنا قلم استعمال کریں۔
