دبئی : شہریوں کو ٹرانسپورٹ کی جدید سہولیات کی فراہمی کیلئے دبئی حکومت نے دبئی میٹرو لائن کا افتتاح کردیا، اس میگا منصوبے پر2.9 ارب ڈالر کی لاگت آئے گی۔
تفصیلات کے مطابق دبئی میٹرو لائن کی 15 کلومیٹر طویل پٹری کی توسیع کا افتتاح کر دیا گیا ہے، سات نئے اسٹیشنوں کا یہ میٹرو روٹ ستمبر کے مہینے میں عوام کے لیے کھول دیا جائے گا۔
متحدہ عرب امارات (یو اے ای) کے نائب صدر، وزیراعظم اور دبئی کے امیر شیخ محمد بن راشد المکتوم نے دبئی میٹرو 2020 کا افتتاح کردیا۔
میٹرو روٹ 2020 کے نام سے 2.9 ارب ڈالر کی لاگت کے اس منصوبہ سے شہر کی میٹرو لائن میں مزید سات اسٹیشنوں کا اضافہ ہوا ہے، یہ منصوبہ ایکسپو 2020 کے منصوبوں میں سے ایک ہے۔
اس نئے روٹ کی تکمیل کے بعد دبئی ارینا سے ایکسپو 2020 کے مقام تک کا فاصلہ صرف 16 منٹ میں طے کیا جاسکے گا۔ سرکاری خبر رساں ادارے وام کے جاری کردہ بیان کے مطابق میٹرو لائن کا یہ جدید منصوبہ دبئی کے شہریوں اور مقیم غیر ملکیوں کے علاوہ سیاحوں کے لیے نقل و حمل کی بہترین اور محفوظ سہولتیں پیش کرنے میں ایک اور اضافہ ہے۔
یہ توسیع منصوبہ دبئی کی سڑکوں اور ٹرانسپورٹ اتھارٹی کے زیر انتظام میٹرو، ٹرام، بسوں اور سمندری ٹرانسپورٹ کے نظام کو مربوط بنائے گا۔
ماسٹر پلان کے حصے کے طور پرمکمل کیا گیا یہ منصوبہ بہترین ماس ٹرانزٹ سسٹم فراہم کرے گا، دبئی کے جنوبی حصے میں قائم کیے گئے نئے اسٹیشنوں سے رہائشیوں اور سیاحوں کو مزید خدمات اور سہولتیں فراہم کی جائیں گی، نئے اسٹیشنوں میں ڈسکوری گارڈنز، الفرجان ، جمیرا گالف اسٹیٹس ، دبئی انویسٹمنٹ پارک شامل ہیں۔
