The news is by your side.

Advertisement

یو اے ای: اسکول فیس بٹ کوائن میں‌

دبئی: دنیا بھر میں بٹ کوائن کا بہ طور کرنسی استعمال وسعت اختیار کرتا جا رہا ہے، جلد اسکول فیسوں کی ادائیگی بھی اس ڈیجیٹل کرنسی میں ہونے لگے گی۔

متحدہ عرب امارات کے شہر دبئی کے ایک اسکول نے ایک اعلامیہ جاری کرتے ہوئے کہا ہے کہ اس نے ایتھریم اور بٹ کوائن جیسی ڈیجیٹل کرنسیوں میں فیس وصولی کے آپشن پر غور شروع کر دیا ہے۔

خیال رہے کہ چند سال قبل تک عوام کی اکثریت بٹ کوائن یا کرپٹو کرنسی کے نام سے واقف تک نہ تھی، لیکن یوکرین پر روسی حملے کے بعد دنیا بھر میں اس کی بازگشت سنائی دے رہی ہے۔

خلیجی ذرائع ابلاغ کے مطابق سٹیزنز اسکول کی جانب سے جاری اعلامیے میں کہا گیا ہے کہ دبئی کی جانب سے کرپٹو اثاثوں کے لیے کی گئی قانون سازی کے بعد ہم والدین کو بٹ کوائن اور ایتھریم کی شکل میں فیس ادا کرنے کی سہولت فراہم کرنے پر سوچ رہے ہیں۔

اسکول انتظامیہ کے مطابق کرپٹوکرنسیوں کی وصولی کے لیے حکومت کی جانب سے متعین کردہ طریقہ کار اور پلیٹ فارم کو استعمال کیا جائے گا، یہ پلیٹ فارم ڈیجیٹل کرنسی کو خود کار طریقے سے درہم میں تبدیل کر دیتا ہے۔

دبئی کے اسکول کے بانی زاویا عادل الزرونی کا کہنا ہے کہ پہلے کرپٹو کرنسی صرف سرمایہ کاروں کے درمیان ہی گھوم رہی تھی، اب یہ مرکزی دھارے میں شامل ہو کر روایتی مالیاتی نظام کو تبدیل کر رہی ہے۔

انتظامیہ کے مطابق امارات کی ڈیجیٹل معیشت میں اس سے نوجوان نسل کا کردار بڑھ جائے گا۔

واضح رہے کہ اس ماہ کے شروع میں یو اے ای کے وزیر اعظم شیخ محمد بن راشد المکتوم نے ڈیجیٹل اثاثوں کے لیے ایک نئے قانون کی منظوری دی تھی۔

Comments

یہ بھی پڑھیں