دبئی شہر نے عالمی سطح پر بڑا اعزاز حاصل کر لیا ہے، دنیا کے 100 بہترین شہروں میں دوسرے نمبر پر آ گیا۔
تفصیلات کے مطابق سیاحت، پائیداری اور اقتصادی کارکردگی کے لیے شہروں کی درجہ بندی کرنے والی ایک تحقیق کے مطابق دبئی دنیا کا دوسرا بہترین شہر ہے۔
رپورٹ کے مطابق اس درجہ بندی میں پیرس نے دوسری بار دنیا کے بہترین شہر ہونے کا اعزاز حاصل کیا ہے، خوشبوؤں کا شہر اور فرانس کا دالحکومت پیرس سیاحوں کی پہلی پسند قرار پایا ہے، یعنی پہلے ورلڈ کپ کا فائنل اور اب فرانس کے پاس کرہ ارض کے بہترین شہر ہونے کا بھی اعزاز آ گیا ہے۔
ٹاپ سو شہروں میں دبئی کو دوسرا بہترین شہر قرار دیا گیا ہے، جب کہ ایمسٹرڈیم تیسرے نمبر پر ہے، چوتھے نمبر پر میڈرڈ، پانچویں پر روم اور لندن چھٹے نمبر پر آیا، ساتویں پر میونخ اور آٹھویں پر برلن براجمان ہوا ہے، بارسلونا نویں نمبر پر جب کہ نیویارک 10 ویں نمبر پر آیا ہے۔
یہ رپورٹ یورو مانیٹر انٹرنیشنل کی ٹاپ 100 سٹی ڈسٹینیشنز رینکنگ نے ڈیٹا انٹیلی جنس کمپنی ٹرانسپیرنٹ انٹیلی جنس کے اشتراک سے جاری کی ہے۔
اس رینکنگ کے لیے 6 اہم شعبوں میں شہروں کا موازنہ کیا گیا، جن میں اقتصادی اور کاروباری کارکردگی، سیاحت کی کارکردگی، سیاحت کا انفرا اسٹرکچر، سیاحت کی پالیسی اور کشش، صحت اور حفاظت، اور پائیداری شامل ہیں۔
لاس اینجلس امریکا کا دوسرا بہترین شہر قرار پایا تاہم مجموعی طور پر 14 ویں پر ہے، سڈنی 32 ویں نمبر پر ہے، لیکن میلبورن (34 واں) سے آگے ہے، اور ایڈنبرا 54 ویں نمبر پر ہے، جب کہ اس کے برعکس ٹائم آؤٹ کی درجہ بندی میں اسے 2022 کا دنیا کا بہترین شہر قرار دیا گیا ہے۔
اس فہرست میں پاکستان کا کوئی شہر نہیں ہے تاہم پڑوسی ملک بھارت کا شہر دہلی 77 ویں نمبر پر آیا ہے۔
