کراچی: چیئرمین پی سی بی محسن نقوی نے کہا ہے کہ دبئی کے ویزے کے بارے میں اچھی خبر دوں گا، پی ایس ایل نئے رنگ کے ساتھ لائیں گے۔
تفصیلات کے مطابق چیئرمین پی سی بی محسن نقوی نے میڈیا سے گفتگو کرتے ہوئے کہا کہ اللہ کا شکر ہے آج کراچی والوں سے کیا گیا وعدہ پورا کیا، نیشنل اسٹیڈیم کراچی قذافی اسٹیڈیم لاہور جیسا ہوجائےگا، انڈیا یا کسی میچ کی پریشانی نہیں، ٹیم کو ایک میسج ہے کہ اچھا کھیلیں۔
محسن نقوی نے کہا کہ نیشنل اسٹیڈیم میں واش روم تک نہیں تھے، کرسیاں خراب تھیں، نیشنل اسٹیڈیم میں ابھی کافی کام باقی ہے، جس جس کو اسٹیڈیم کے بننے کا مسئلہ تھا اب ان کو جواب مل گیا۔
انھوں نے کہا کہ اسٹیڈیم سے متعلق ہم بہت پیچھے تھے اب سب سے آگے ہیں، حیدرآباد یا سکھر میں اسٹیڈیم بنانے سے متعلق سندھ حکومت سے بات ہوئی ہے، وزیراعظم نے مظفرآباد کا اسٹیڈیم بنانے کا کہا ہے، میں اکیلا کچھ نہیں کرسکتا یہ سب ٹیم ورک ہے۔
چیئرمین پی سی بی کا کہنا تھا کہ اچھے اسٹیڈیم ڈومیسٹک کے لیے بہت ضروری ہیں، نجی کمپنیوں کو بول رہا ہوں کہ ہمارے ساتھ مل کر کام کریں۔
محسن نقوی نے مزید کہا کہ پی ایس ایل اس بار نئے رنگ کے ساتھ کریں گے، سابق چیئرمین سارے میرے ساتھی ہیں ان کی عزت کرتا ہوں، جس چیئرمین نے بھی کرکٹ کیلئے کام کیا اس کی عزت کرنا ہم سب کا فرض ہے۔
