لاہور: صبح سویرے پنجاب کے کئی شہروں میں بارش سے گرمی کا زور ٹوٹ گیا۔
تفصیلات کے مطابق پنجاب کے شہروں لاہور، گجرات، حافظ آباد، منڈی بہاؤالدین اور فیصل آباد میں رم جھم برسات سے گرمی کا زور ٹوٹ گیا۔
شیخوپورہ میں بارش کے ساتھ ہی متعدد فیڈر ٹرپ کر گئے، اور کئی مقامات پر بجلی کی فراہمی معطل ہو گئی۔
سرائے عالمگیر میں شہر اور گرد و نواح میں طوفانی بارش ہوئی، جڑانوالہ شہر اور گرد و نواح، پھالیہ اور گرد و نواح، گجرات اور گرد و نواح، شیخوپورہ شہر اور گرد و نواح، فیروزوالا میں شہر اور گرد و نواح میں موسلا دھار بارش برسی۔
بارش سے قصور، چھانگا مانگا میں بھی موسم خوشگوار ہو گیا ہے، ڈسکہ کے مختلف علاقوں میں گرج چمک کے ساتھ تیز بارش ہوئی، مرید کے اور جلالپور بھٹیاں میں بھی وقفے وقفے سے بارش ہوئی۔
بارش، گلیشیئر پگھلنے اور لینڈ سلائیڈنگ کے باعث مانسہرہ میں بابوسر ٹاپ روڈ شام 6 بجے کے بعد آمد و رفت پر دوبارہ پابندی عائد کر دی گئی ہے۔
آج سے 8 جولائی تک مون سون بارشوں کی پیشگوئی کے باعث پی ڈی ایم اے بلوچستان نے بھی الرٹ جاری کر دیا ہے، اور ڈپٹی کمشنرز کو خصوصی حفاظتی اقدامات کی ہدایت کر دی گئی ہے۔
