خلیجِ بنگال کے مختلف علاقے زلزلے سے لرز اُٹھے، جس کی شدت 5.1 ریکارڈ کی گئی ہے۔
بین الاقوامی خبر رساں ادارے کی رپورٹ کے مطابق نیشنل سینٹر فار سیسمولوجی (این سی ایس) نے اس حوالے سے بتایا کہ (منگل کی) صبح 6 بج کر 10 منٹ پر خلیجِ بنگال میں زلزلے کے جھٹکے محسوس کئے گئے۔
رپورٹس کے مطابق خلیجِ بنگال میں یہ زلزلہ 91 کلو میٹر کی گہرائی میں آیا جبکہ زلزلے کے جھٹکے مغربی بنگال کے مختلف علاقوں میں محسوس کیے گئے۔
زلزلے کے باعث لوگوں میں خوف و ہراس پھیل گیا اور وہ گھروں سے باہر نکل آئے، تاہم زلزلے سے کسی قسم کے نقصان کی اطلاع سامنے نہیں آئی۔
واضح رہے کہ بھارت کے دہلی میں بھی ایک بار پھر زلزلے کے جھٹکے محسوس کیے گئے جو کہ گزشتہ ایک ہفتے میں تیسری مرتبہ ہے۔
جاپان میں آئندہ سالوں میں کتنا خوفناک زلزلہ آسکتا ہے؟ حیران کن پیشگوئی
بھارتی میڈیا رپورٹس کے مطابق زلزلہ گزشتہ روز آیا، جس کی شدت 2.2 تھی اور اس کا مرکز جنوب مشرقی دہلی میں واقع تھا۔ اگرچہ یہ زلزلہ زمین سے 10 کلومیٹر کی گہرائی میں آیا اور اس کی شدت معمولی تھی تاہم دہلی، این سی آر میں مسلسل زلزلے کے جھٹکوں نے شہریوں میں خوف پیدا کردیا ہے۔
رپورٹس کے مطابق ایک دن پہلے ہی غازی آباد میں بھی ہلکی شدت کا زلزلہ محسوس کیا گیا تھا، جبکہ اس سے قبل بھی گزشتہ ایک ہفتے کے دوران دہلی،این سی آر میں دو دیگر زلزلے آچکے ہیں۔
