اسلام آباد: الیکشن کمیشن نے 17 اکتوبر کو سندھ میں انتخابی تیاریوں سے متعلق اجلاس طلب کرلیا۔
ذرائع الیکشن کمیشن کے مطابق عام انتخابات کیلئے صوبائی حکومت کی تیاری سے متعلق اہم اجلاس طلب کیا گیا ہے، اس اجلاس کی صدارت چیف الیکشن کمشنر کریں گے۔
ذرائع کا کہنا ہے کہ سندھ کے چیف سیکریٹری اور آئی جی سندھ پولیس اجلاس کو عام انتخابات کے لیے صوبے کی تیاریوں کے بارے میں بریفنگ دیں گے۔
یاد رہے کہ نگراں وفاقی وزیر اطلاعات و نشریات مرتضیٰ سولنگی نے کہا ہے کہ آئندہ عام انتخابات جنوری کے آخر میں ہوں گے۔
الیکشن کمیشن آف پاکستان کا حوالہ دیتے ہوئے نگراں وفاقی وزیر اطلاعات نے کہا تھا کہ انتخابی حلقوں کی حتمی فہرست اگلے ماہ کی 30 تاریخ کو طے کی جائے گی اور اسی وقت انتخابات کی تاریخ کا اعلان کیا جائے گا۔
الیکشن کمیشن آف پاکستان (ای سی پی) نے پہلے اعلان کیا تھا کہ عام انتخابات جنوری 2024 کے آخری ہفتے میں ہوں گے۔
