اسلام آباد : اقتصادی رابطہ کمیٹی آج پیراسیٹا مول سمیت 131 ادویات کی قیمتوں میں اضافے کا فیصلہ کرے گی۔
تفصیلات کے مطابق وزیر خزانہ اسحاق ڈار کی زیر صدارت اقتصادی رابطہ کمیٹی کا اجلاس وزیراعظم ہاؤس آج ہوگا۔
وزارت صحت کی جانب سے ادویات کی قیمتوں میں اضافے کی سمری منظوری کیلئے پیش کی جائے گی۔
ذرائع کے مطابق پیراسیٹا مول سمیت ایک سواکتیس ادویات کی قیمتوں میں اضافہ فیصلہ کیا جائےگا جبکہ کمیٹی بیس ادویات کی قیمتوں میں کمی کی بھی منظوری دے گی۔
کامیاب پاکستان پروگرام کی منظوری، وزیراعظم آفس کیلئےٹیکنیکل سپلیمنٹری گرانٹ کااجرا اورگلگت بلتستان میں گندم سبسڈی کا مسئلہ بھی کمیٹی کے سامنے پیش کیا جائے گا۔
ذرائع کا کہنا ہے کہ پیراسٹامول سیرپ کی قیمت میں بارہ روپے سے زیادہ کا اضافہ متوقع ہے، جس کے بعد پیراسٹامول کی ایک گولی اسی پیسے مہنگی ہوجائے گی۔
دوا ساز کمپنیوں کا کہنا ہے کہ گزشتہ چھ ماہ سے خام مال کی سپلائی متاثر ہے، ایل سی مسترد ہورہی ہیں، خام مال کی عدم دستیابی اور کم نرخوں کی وجہ سے کمپنیاں دیوالیہ ہو رہی ہیں جبکہ کئی ملٹی نیشنل کمپنیاں اپنے پلانٹ بند کرچکی ہیں، پرانے نرخوں پر کام کرنا اب ممکن نہیں رہا۔
