اسلام آباد : معاون خصوصی برائے خزانہ طارق باجوہ نے کہا ہے کہ ملکی معیشت کو بلند مالی خسارے کا سامنا ہے، رواں مالی سال خسارہ5 فیصد سے کم رکھنے کی کوشش کریں گے۔
ان خیالات کا اظہار انہوں نے ایس ڈی پی آئی کے تحت کانفرنس سے خطاب کرتے ہوئے کیا، انہوں نے کہا کہ آئی ایم ایف پروگرام کے اہداف کو حاصل کیا جائے گا۔
معاون خصوصی خزانہ کا کہنا تھا کہ آئی ایم ایف کے اہداف پر عمل درآمد کیلئے پرعزم ہیں، حکومت غریب طبقے پر زیادہ فنڈز خرچ کرنا چاہتی ہے تاہم آئی ایم ایف پروگرام کے تحت فنڈز خرچ کرنے کی گنجائش کم ہے۔
طارق باجوہ نے کہا کہ پاکستان میں سیلاب سے بڑے پیمانے پر تباہی ہوئی، ہم نے اپنی زندگی میں اتنا بڑاسیلاب پہلے کبھی نہیں دیکھا، سیلاب سے بحالی کے منصوبے حکومت کی اولین ترجیح ہیں۔
معاون خصوصی برائے خزانہ کا مزید کہنا تھا کہ کسان پیکج کے تحت کسانوں کو بلاسود قرضے دیے جارہے ہیں، مفت بیج سبسڈی کی بنیاد پر کھاد کی فراہمی جاری ہے۔
