اسلام آباد : الیکشن کمیشن کراچی میں بلدیاتی انتخابات سے متعلق درخواستوں پر آج فیصلہ سنائے گا، جمعہ کو درخواستوں پر سماعت کے بعد فیصلہ محفوظ کیا تھا۔
تفصیلات کے مطابق الیکشن کمیشن کی جانب سے کراچی میں بلدیاتی انتخابات سےمتعلق ایم کیوایم، جماعت اسلامی اور سندھ حکومت کی درخواستوں پرآج فیصلہ سنایا جائے گا۔
چیف الیکشن کمشنر کی زیر صدارت 3رکنی کمیشن صبح 10بجے محفوظ فیصلہ سنائے گا۔
الیکشن کمیشن نے کاز لسٹ جاری کردی ، جس کے مطابق وزیرخزانہ اسحاق ڈار کی سینیٹ کی خالی نشست سےمتعلق بھی آج فیصلہ سنایا جائے گا۔
یاد رہے سندھ حکومت اور ایم کیو ایم کی جانب سے بلدیاتی الیکشن کے التوا جب کہ جماعت اسلامی نے انتخابات طے شدہ تاریخ پر کرانے کی درخواستیں دائر کی تھیں، جس پر الیکشن کمیشن نےجمعہ کو درخواستوں پر فیصلہ محفوظ کیا تھا۔
اس موقع پر چیف الیکشن کمشنر سلطان سکندر راجا نے کہا کہ بلدیاتی انتخابات وقت پر کرانے کیلئے حکومتوں کو خط لکھے ہیں۔ لیکن سیاسی جماعتوں کی بلدیاتی انتخابات وقت پر کرانے پر توجہ نہیں اور بلدیاتی انتخابات سے قبل قوانین تبدیل کرکے ہاتھ باندھے جاتے ہیں۔ اس پر اسپیکر قومی اسمبلی، چیئرمین سینیٹ اور وفاق کو بھی وضاحت کیلیے خط لکھے ہیں۔
واضح رہے الیکشن کمیشن کی جانب سے کراچی میں 15 جنوری کو بلدیاتی انتخابات کا اعلان کیا جا چکا ہے۔
