اسلام آباد: الیکشن کمیشن آف پاکستان نے خسروبختیار اور ہاشم جواں بخت کیخلاف آمدن سے زائداثاثوں سے متعلق کیس کو ناقابل سماعت قراردے دیا ہے۔
تفصیلات کے مطابق الیکشن کمیشن میں رکن قومی اسمبلی خسروبختیار اور صوبائی وزیر خزانہ پنجاب ہاشم جواں بخت کیخلاف آمدن سے زائداثاثوں سے متعلق کیس کی سماعت ہوئی، الیکشن کمیشن کےممبر الطاف ابراہیم کی سربراہی میں چار رکنی کمیشن نے درخواست پر سماعت کی۔
اس موقع پر درخواست گزار احسن عابد الیکشن کمیشن میں پیش ہوئے، جہاں کمیشن نے خسرو بختیار اور ہاشم جواں بخت کے خلاف آمدن سے زائد اثاثوں پر فیصلہ سناتے ہوئے کیس کو ناقابل سماعت قرار دیا۔
اس سے قبل گذشتہ سال اگست میں بھی سپریم کورٹ لاہور رجسٹری نے وفاقی وزیر خسرو بختیار اور ہاشم جواں بخت کی نااہلی کیلئے درخواستیں مسترد کر دیں تھیں۔
یہ بھی پڑھیں: وفاقی وزیر خسرو بختیار اور ہاشم جواں بخت کی نااہلی کیلئے درخواستیں مسترد
جسٹس منصور علی شاہ کی سربراہی میں دو رکنی بینچ نے احسن عابد کی جانب سے مخدوم برادران کی نا اہلی کیلئے درخواستوں پر سماعت کی، درخواست گزار نے موقف اختیار کیا تھا کہ خسرو بختیار اور ہاشم جواں بخت نے الیکشن لڑتے وقت اپنے اثاثے چھپائے، دونوں بھائیوں کو آرٹیکل باسٹھ تریسٹھ کے تحت نااہل قرار دیا جائے، دلائل کے بعد عدالت نے مخدوم برادران کی نااہلی کیلئے درخواستیں مسترد کر دیں۔
یاد رہے کہ سال دوہزار اٹھارہ میں خسرو بختیار نے این اے 177 اور ہاشم جواں بخت نے پی پی 259 سے انتخاب میں کامیابی حاصل کی تھیں۔
