اسلام آباد : خیبرپختونخوا اور بلوچستان کے بعض علاقوں میں بیلٹ پیپرز کی فضائی راستے سے ترسیل کا فیصلہ کرلیا گیا۔
تفصیلات کے مطابق الیکشن کمیشن نے خیبرپختونخوااور بلوچستان کے بعض علاقوں میں بیلٹ پیپرز کی فضائی راستے سے ترسیل کا فیصلہ کرلیا۔
ذرائع الیکشن کمیشن کا کہنا تھا کہ گوادر، پنجگور، کیچ، خاران، باجوڑ اور کرم میں بیلٹ پیپرز ہیلی کاپٹر اور سی ون تھرٹی طیاروں کے ذریعے بھجوائے جائیں گے۔
ذرائع نے بتایا کہ قومی اور صوبائی اسمبلیوں کےبیلٹ پیپرزہیلی کاپٹر اور سی ون 30 کے ذریعہ بھجوائےجائیں گے۔
ذرائع کے مطابق اسلام آباد سے قومی اسمبلی کی 3نشستوں کےبیلٹ پیپرز کی چھپائی آج شروع کی جائے گی، بلوچستان سے قومی، صوبائی اسمبلیوں کے تمام حلقوں کے بیلٹ پیپرزکی چھپائی مکمل کر لی گئی۔
ذرائع الیکشن کمیشن کا کہنا تھا کہ خیبرپختونخوا کے90 فیصد ووٹوں کی طباعت مکمل ہو گئی ہے، پنجاب کے 90 اور سندھ کے 70 فیصد بیلٹ پیپرز کی چھپائی مکمل ہو گئی۔
ذرائع نے کہا کہ کراچی میں ایک اور اسلام آباد میں دو سرکاری پرنٹنگ پریس بیلٹ پیپرزشائع کر رہے ہیں، صوبوں کو بیلٹ پیپرز کی فراہمی جاری ہے۔
ذرائع نے بتایا کہ عام انتخابات کے لیےخصوصی فیچرز کےحامل کاغذ کی ضرورت 2400ٹن تھی، بیلٹ پیپر کا سائز کم کر کے اس ضرورت کو 2170 ٹن تک لایا گیا ہے، 2170 ٹن خصوصی کاغذ صرف ایک مرتبہ چھپائی کیلئےبامشکل کافی ہے، قومی اور صوبائی اسمبلیوں کیلئے3 فروری تک مجموعی طور پر 26 کروڑبیلٹ پیپرز شائع کئے جائیں گے۔
