لندن: برطانیہ میں ایک ہی دن میں چار چاقو زنی کی وارداتوں کے نتیجے میں 5 افراد زخمی ہوگئے۔
تفصیلات کے مطابق شمالی لندن میں یکے بعد دیگر چاقو کے حملوں کے نتیجے میں پانچ افراد زخمی ہوگئے، جس سے شہریوں میں خوف واہراس پایا جاتا ہے۔
غیر ملکی خبر رساں ادارے کا کہنا ہے کہ پولیس کو راہگیروں پر عقب سے حملہ کرنے والے شخص کی تلاش ہے، پولیس نے شہریوں کو چوکنا رہنے کی بھی ہدایت کی ہے۔
پولیس حکام کے مطابق زخمی ہونے والوں میں 45 سالہ خاتون بھی شامل ہے جس کی حالت تشویشناک ہے، حملہ آور ایک ہی ہے جبکہ تمام حملے اسی سلسلے کی ایک کڑی ہے۔
چاقو زنی کی وارداتوں کا دہشت گردی سے کوئی تعلق نہیں، ابتدائی اطلاعات کے مطابق حملہ آور ذہنی مرض کا شکار ہوسکتا ہے، گرفتاری کے لیے چھاپے مارے جارہے ہیں۔
پولیس کی جانب سے چند گرفتاریاں بھی عمل میں آئیں ہیں جن سے پولیس تفتیش کررہی ہے، البتہ مرکزی ملزم قانون کے شکنجے سے تاحال باہر ہے۔
سیکیورٹی اہلکاروں نے بتایا ہے کہ حملہ آور سیاہ فام ہے جس کا قد تقریباً چھ فٹ تین انچ ہے اور اس نے گہرے رنگ کے کپڑے پہنچ رکھے ہیں، شہریوں کو ایسی صورت حال میں محتاط رہنے کی ہدایت کی جاتی ہے۔
لندن میں چاقو بردار شخص کا ایک اور حملہ، نوجوان ہلاک
یاد رہے کہ گذشتہ دنوں برطانوی دارالحکومت میں 17 سالہ جوان چاقو کے متعدد وار کے باعث ہلاک ہوگیا تھا، مقتول جھگڑے کے دوران چاقو زنی کا شکار ہوا۔
