آج ملک بھر میں عیدالاضحیٰ مذہبی جوش و جذبے سے منائی جا رہی ہے، نماز عید کے بعد سنتِ ابراہیمی کی پیروی میں قربانی کی جا رہی ہے۔
اے آر وائی نیٹ ورک کی طرف سے اہل وطن کو عیدالاضحیٰ کی خوشیاں مبارک ہوں، ملک کے چھوٹے بڑے شہروں میں نماز عید کے روح پرور اجتماعات منعقد ہوئے، کراچی میں سبیل والی مسجد، پولو گراؤنڈ میں نمازعید ادا کی گئی، لاہور میں باغ جناح، داتا دربار میں نماز عید ادا کی گئی، پشاور کی مرکزی عیدگاہ میں بھی نمازعید ادا کی گئی، لاہور میں نماز عید کا سب سے بڑا اجتماع شاہی مسجد، اور اسلام آباد کی فیصل مسجد میں نماز عید کا سب سے بڑا اجتماع ہوا۔
وزیر اعظم شہباز شریف نے عید کی نماز اپنی رہائش گاہ ماڈل ٹاؤن لاہور میں ادا کی، جب کہ قائم مقام صدر و چیئرمین سینیٹ صادق سنجرانی نے کوئٹہ میں نماز عید ادا کی۔
وزیر اعظم نے عید کے موقع پر اپنے پیغام میں کہا کہ قربانی ایک رسم نہیں بلکہ ایک عالمگیر جذبہ ہے، اس کا مقصد اعلیٰ مقاصد کے حصول کے لیے اپنی متاع حیات کو اللہ کے راستے میں قربان کرنا ہے، کوئی قوم اس وقت تک ترقی نہیں کر سکتی جب تک اس میں ایثار اور قربانی کا جذبہ موجود نہ ہو۔
