کراچی: سندھ بورڈ آف فلم سنسر (ایس بی ایف سی) کے چیئرمین خالد بن شاہین نے اعلان کیا ہے کہ بقر عید سے قبل اپنی فلمیں سنسر کے جائزے کے لیے بورڈ کے پاس جمع کرائیں۔
تفصیلات کے مطابق عید الاضحیٰ میں چند ہی دن رہ گئے ہیں، ایسے میں سندھ کے فلم سنسر بورڈ کے چیئرمین نے فلم سازوں اور پروڈیوسرز سے اپیل کی ہے کہ وہ اپنی ریلیز کی تاریخوں، بالخصوص عید کی ریلیز سے قبل اپنی فلمیں سنسر کے جائزے کے لیے جمع کرائیں۔
ان کا کہنا تھا کہ تاخیر اور پیچیدگیوں سے بچنے کے لیے ضروری ہے کہ فلم ساز وقت پر فلمیں سنسر کروا لیں، کیوں کہ عید جیسے تہواروں پر ریلیز کے آخری لمحوں میں فلمیں جمع کرائے جانے کے رجحان کی وجہ سے بورڈ کے اراکین کو وقت کی کمی کے باعث دباؤ کا سامنا کرنا پڑتا ہے۔
خالد بن شاہین نے کہا کہ چیلنجوں کے باوجود سنسر ٹیم سنیما ٹریڈ اور فلم انڈسٹری کو بہتر سروسز کی فراہمی کے لیے تندہی سے کام کر رہی ہے، اور سنسرنگ کے عمل میں فلم سازوں کو در پیش رکاوٹیں دور کرنے اور ایک خوشگوار تجربے کو یقینی بنایا جا رہا ہے۔
ہارر فلم ’بلیک فون 2‘ کا آفیشل ٹریلر ریلیز، فلم کب ریلیز ہوگی؟
چیئرمین ایس بی ایف سی نے عید الاضحیٰ پر ریلیز ہونے والی تمام فلموں کی کامیابی کے لیے نیک خواہشات کا اظہار بھی کیا، انھوں نے امید ظاہر کی کہ یہ فلمیں شائقین کو محظوظ کریں گی اور لوگوں کے لیے خوشی کا باعث بنیں گی۔
