عید الاضحٰی کے موقع پر جانور کی قربانی کے بعد اب تقریباً ہر گھر کے فرج اور ڈیپ فریزرز گوشت سے بھر چکے ہیں اور لوگ طرح طرح کے پکوانوں سے لطف اندوز بھی ہو رہے ہیں۔
اس کے علاوہ عید کے دو روز میں لوگوں نے جی بھر کر گوشت کی دعوتیں اڑائیں اور تکہ بوٹی سیخ کباب اور کڑھائی کے مزے لیے، کہیں بار بی کیو پارٹیاں منعقد کی جا رہی ہیں تو کہیں چپلی کباب کی خوشبو آپ کو بد پرہیزی پر اکسا رہی ہے۔
یہ سلسلہ نہ صرف اگلے کئی دنوں تک جاری رہے گا بلکہ کچھ گھرانوں میں تو کئی ماہ تک قربانی کا محفوظ شدہ گوشت استعمال ہوتا رہے گا لیکن ان سب باتوں میں یہ نہ بھول جائیں کہ پیٹ آپ کا اپنا ہے اور آپ نے ہی اس کا خیال بھی رکھنا ہے۔
اس حوالے سے آے آر وائی نیوز کے پروگرام باخبر سویرا میں ماہر صحت ڈاکٹر اریج نے ناظرین کو اہم مشورے دیئے اور عید کے ان ایام میں خود کو کسی تکلیف یا بیماری سے محفوظ رہنے کے آسان طریقے بھی بتائے۔
انہوں نے کہا کہ گوشت کو زیادہ دن تک فریج میں نہیں رکھنا چاہیے اس سے گوشت کی تازگی اور غذائیت پر بھی برا اثر پڑتا ہے جو صحت کیلئے بہت نقصان دہ ہے۔
ان کا کہنا تھا کہ عید الضحٰی کے موقع پر گوشت کے استعمال میں اگر اعتدال سے کام نہ لیا جائے تو پیٹ اور معدے کے امراض لاحق ہو جاتے ہیں، معدے میں تیزابیت اور بد ہضمی ہونے سے دیگر امراض بھی لاحق ہو سکتے ہیں۔
خیال رہے کہ عیدالاضحیٰ کے موقع پر بسیارخوری اور بہت زیادہ گوشت کھانے کی وجہ سے مریضوں کی ایک بڑی تعداد اسپتال پہنچ جاتی ہے لہٰذا معتدل کھانے کے لئے دیگر اشیاء بالخصوص سبزیوں ، پھلوں اور پانی کا زیادہ سے زیادہ استعمال کریں۔
