امیر جماعت اسلامی کراچی حافظ نعیم الرحمان نے موبائل فون سروس بحال کرنے کا مطالبہ کردیا۔ انہوں نے کہا کہ موبائل سروس بند کرکے 25 کروڑ عوام سےزیادتی کی گئی ۔
اے آر وائی نیوز کے مطابق حافظ نعیم الرحمان کا کہنا تھا کہ اکثر مقامات میں سامان موجود ہے لیکن عملہ نہیں، چوکیداروں اور ڈرائیوروں کو پریزائیڈنگ افسربنا دیا گیا ہے۔ الیکشن کمیشن بتائے الیکشن کے نام پرکیا مذاق کیا جا رہا ہے ۔
دوسری جانب موبائل فون سروس کی اچانک بندش پر نگراں وزیر اطلاعات سندھ احمد شاہ کا کہنا ہے کہ موبائل سروس سے متعلق اعلان ہوا تھا کہ بند نہیں ہو گی تاہم وزارت داخلہ نے اچانک موبائل سروس بند کی ہے ۔
احمد شاہ نے کہا کہ موبائل سروس بند کرنا وفاقی حکومت کے اختیار میں ہے ۔ پولنگ سے ایک دن قبل بلوچستان میں دہشتگردی کے واقعات ہوئے ہیں جب کہ کراچی کے علاقے گلشن اقبال میں بھی لڑکے کے ہاتھ میں دستی بم پھٹا ہے ۔
ان کا کہنا تھا کہ انٹرنیٹ پر سیاسی جماعتیں بھی مہم چلا رہی تھیں ۔ پاکستان کے اندر اور باہر دشمن انتخابات پر نظر لگا کر بیٹھے ہیں ۔ نگراں حکومت کی کوشش ہے کہ اقتدار پُر امن طریقے سے منتقل ہو جائے ۔
نگراں وزیر اطلاعات نے مزید کہا کہ پورے سندھ میں پُر امن طریقے سے پولنگ جاری ہے، جیسے جیسے وقت گزرے گا پولنگ کا عمل بھی تیز ہوگا ۔ پولنگ سامان چھیننے کے ایک دو واقعات ہوئے جن میں بیلٹ باکس ریکور کرا لیے گئے ہیں ۔
ملک بھر میں انٹرنیٹ، موبائل فون سروس عارضی طور پر معطل کرنے کا فیصلہ
ان کا یہ بھی کہنا تھا کہ سندھ حکومت نے انٹرنیٹ بند کرنے کی کوئی سفارش نہیں کی۔ ایپکس کمیٹی میں بھی طے ہوا تھا کہ انٹرنیٹ سروس بند نہیں ہو گی۔
