اسلام آباد: ملک میں بلدیاتی انتخابات کے سلسلے میں الیکشن کمیشن نے 2 ستمبر کو اہم اجلاس طلب کر لیا۔
تفصیلات کے مطابق الیکشن کمیشن کی جانب سے بلدیاتی انتخابات کے انعقاد کے سلسلے میں دو ستمبر کو اجلاس طلب کر کے پنجاب میں حلقہ بندیوں کی پیش رفت کا جائزہ لیا جائے گا۔
الیکشن کمیشن کا کہنا ہے کہ اجلاس میں متعقلہ رولز کے نوٹیفکیشن کے اجرا پر بات چیت کی جائے گی، اور صوبائی نمائندگان سے مشاورت کی جائے گی، انتخابی مواد کے حصول اور بیلٹ پیپرز کی چھپائی کا جائزہ لیا جائے گا۔
الیکشن کمیشن کے مطابق اجلاس میں ڈی آر اوز اور آر اوز کی تعیناتی پر بھی فیصلے ہوں گے، سندھ میں حلقہ بندیوں سے متعلق کمیٹیوں کا جائزہ لیا جائے گا، حلقہ بندی سے متعلق اتھارٹیز کے قیام کا معاملہ بھی زیر بحث آئے گا۔
الیکشن کمیشن آف پاکستان کا سندھ میں بلدیاتی حلقہ بندیوں کا اعلان
اجلاس میں خیبر پختون خوا میں ڈویژنل ہیڈ کوارٹرز پر سٹی کونسل کی تشکیل بھی زیر غور آئے گی، بلوچستان میں بلدیاتی انتخابات سے متعلق ایکٹ، رولز کا بھی جائزہ لیا جائے گا۔
دریں اثنا، الیکشن کمیشن نے سندھ میں آئندہ بلدیاتی انتخابات کے لیے مجوزہ انتخابی حلقوں کی حد بندی کا نوٹیفکیشن جاری کر دیا ہے، الیکشن کمیشن کی مقرر کردہ کمیٹیاں 9 ستمبر سے حلقہ بندیوں کا کام شروع کریں گی، 30 اکتوبر تک کمیٹیاں سندھ بھر میں حلقہ بندیوں کا کام مکمل کر لیں گی۔
