اسلام آباد: الیکشن کمیشن نے عمران خان کےخط کا جواب دیدیا، جس میں کہا گیا ہے کہ آئینی ادارہ ہیں، کسی سیاسی جماعت کو جوابدہ نہیں۔
الیکشن کمیشن نے کپتان کے خط کا بالآخر جواب دے ہی دیا، جس میں ان کے سوالات کا بھرپور جواب دیا، الیکشن کمیشن نے عمران خان کے خط میں کیے گئے مطالبات کو یکسر مسترد کرتے ہوئے کہا ہے کہ الیکشن کمیشن آئینی ادارہ ہے کسی سیاسی جماعت کو جوابدہ نہیں ہے، اس لیے عمران خان الیکشن کمیشن سے اس طرح وضاحت نہیں مانگ سکتے۔
الیکشن کمیشن نے جوابی خط میں کہا ہے کہ عمران خان بے بنیاد الزامات لگانے سے گریز کریں۔
یاد رہے کہ کپتان نے خط میں الیکشن کمیشن سے بے ضابطگیاں کرنے والے انتخابی عملے کیخلاف کارروائی کا مطالبہ بھی کیا تھا، جس پر الیکشن کمیشن کا کہنا ہے کہ عام انتخابات میں عملہ ضلعی انتظامیہ اور تعلیمی اداروں سے لیا جاتا ہے، اس لیے ان کیخلاف کارروائی نہیں کرسکتے۔
الیکشن کمیشن کی جانب سے بھیجا گیا ہنگامی مراسلہ اے آروائی نیوز نے حاصل کرلیا ،مراسلے میں عمران خان کیجانب سے تیس جولائی کو الیکشن کمیشن کو لکھے گئے خط کا ذکر کیا گیا ہے۔
