بلدیاتی الیکشن کرانے میں باربار تاخیر کرنے پر الیکشن کمیشن آف پاکستان نے پنجاب حکومت کو نوٹس بھیج دیا، تاحال اقدامات کا معلوم نہیں۔
الیکشن کمیشن کی جانب سے چیف سیکریٹری پنجاب اور سیکریٹری بلدیاتی حکومت کو نوٹس جاری کیا گیا ہے، الیکشن کمیشن نے کہا کہ تاحال معلوم نہیں پنجاب حکومت نے بلدیاتی انتخابات کیلئے کیا اقدامات کیے، الیکشن کمیشن نے پنجاب میں بلدیاتی انتخابات کیلئے اجلاس کی یاد دہانی کرائی۔
پنجاب میں بلدیاتی قانون 4 بار تبدیل ہوا، الیکشن کمیشن نے 3 بار حلقہ بندیاں کرائیں، حکومتی درخواست پر پنجاب لوکل گورنمنٹ قانون مکمل کرنے کیلئے 4 ہفتے کا وقت دیا گیا۔
الیکشن کمیشن نے ارکان پارلیمنٹ کو مہلت دیدی
الیکشن کمیشن کو یونین کونسل کی حلقہ بندیاں بھی روکنا پڑیں، پنجاب حکومت کو کہا تھا ایک ماہ میں قانون سازی مکمل کرے مزید توسیع نہیں دی جائیگی۔
پنجاب حکومت نے پنجاب بلدیاتی حکومت قانون الیکشن کمیشن سے 26 دسمبر کو شیئرکیا، الیکشن کمیشن نے پنجاب حکومت کو 23 جنوری کو اپنا فیڈبیک بھجوا دیا تھا، ابھی تک پنجاب حکومت نے بلدیاتی حکومت قانون سازی کیلئے اقدامات نہیں کیے۔
پنجاب حکومت نےالیکشن کرانے کےلیے بھی کوئی اقدامات نہیں کیے، الیکشن کمیشن نے پنجاب میں بلدیاتی الیکشن کا معاملہ سماعت کےلیے مقرر کردیا۔
