سندھ ہائیکورٹ نے بلدیاتی الیکشن سے متعلق کیس میں الیکشن کمیشن سے کہا ہے کہ وہ 3 دسمبر تک بلدیاتی انتخابات کے شیڈول کا اعلان کرے۔
اے آر وائی نیوز کے مطابق سندھ ہائیکورٹ نے بلدیاتی الیکشن میں تاخیر سے متعلق تحریری فیصلہ جاری کردیا ہے جس میں الیکشن کمیشن سے کہا گیا ہے کہ وہ 3 دسمبر تک کراچی اور حیدرآباد میں بلدیاتی انتخابات کے شیڈول کا اعلان کرے۔
بلدیاتی الیکشن جلد کرانے سے متعلق جماعت اسلامی اور پی ٹی آئی کی درخواستیں منظور کرتے ہوئے سندھ ہائیکورٹ نے جو محفوظ فیصلہ سنایا تھا اب تحریری فیصلہ جاری کردیا ہے۔
سولہ صفحات پر مشتمل تحریری فیصلہ جسٹس محمد علی سعید نے لکھا ہے جس میں کہا گیا ہے کہ انتخابات کرانا الیکشن کمیشن کی ذمے داری ہے اسے ڈکٹیٹ نہیں کیا جاسکتا، لیکن الیکشن کمیشن کو لوکل ایڈمنسٹریشن اور شہریوں کے حقوق کے مطابق ہی عمل کرنا چاہیے۔ عوام کو اپنے نمائندے منتخب کرنے کا اختیار ہے۔
عدالتی فیصلے میں الیکشن کمیشن کو گائیڈ لائین دیتے ہوئے کہا گیا ہے کہ الیکشن کمیشن 15 دن کے اندر 3 دسمبر تک کراچی اور حیدرآباد میں بلدیاتی انتخابات کے شیڈول کا اعلان کرے۔ بلدیاتی الیکشن کی تاریخ 2 ماہ کے اندر اندر ہونی چاہیے اور اس سے متعلق 60 روز میں اقدامات مکمل کرے۔
فیصلے میں یہ بھی کہا گیا ہے کہ سندھ حکومت بلدیاتی انتخابات کیلئےسیکیورٹی سمیت سہولتوں کی فراہمی کا پابند ہے۔ انتخابات سے قبل چیف سیکریٹری اور آئی جی سندھ ضروری اقدامات کے پابند ہوں گے۔
یہ بھی پڑھیں: عدالت کا کراچی اور حیدرآباد میں فوری الیکشن شیڈول جاری کرنے کا حکم
تحریری فیصلے میں یہ بھی کہا گیا ہے کہ ایم کیو ایم بھی اس درخواست میں فریق بنی تھی اور اس نے حلقہ بندیوں، بلدیاتی اداروں کو اختیارات ملنے تک الیکشن نہ کرانے کی تجویز دی تھی لیکن اس سے قبل بھی ایم کیو ایم کی انتخابات ملتوی کرنے کی درخواست مسترد ہو چکی ہے۔
