اسلام آباد : پنجاب کے پی انتخابات التوا کیس میں سیکرٹری دفاع نے سیکیورٹی صورتحال سے متعلق سربمہر رپورٹ سپریم کورٹ میں جمع کرادی۔
تفصیلات کے مطابق سپریم کورٹ پنجاب اور خیبرپختونخوا میں انتخابات التوا کیس کا فیصلہ آج سنائے گی ، سیکرٹری دفاع نے سیکیورٹی صورتحال سے متعلق سربمہر رپورٹ سپریم کورٹ میں جمع کرادی۔
رپورٹ میں انتخابات کے لیے فوج کی عدم دستیابی کی وجوہات بیان کی گئی ہیں، چیف جسٹس عمر عطاء بندیال بینچ کے دو ارکان کے ساتھ رپورٹ کا جائزہ لیں گے، جس کے بعد فیصلہ سنایا جائے گا۔
گذشتہ روز چیف جسٹس کی سربراہی میں تین رکنی بینچ نے پی ٹی آئی کی درخواستوں پر انتخابات التوا کیس کا فیصلہ محفوظ کیا تھا۔
چیف جسٹس نے ریمارکس دیے تھے کہ حکومت نے ایسا کوئی موادنہیں دیاجس پر الیکشن ملتوی ہوسکیں جبکہ حائل رکاوٹوں سے بھی آگاہ نہیں کیا گیا اور سیاسی مذاکرات کےآپشن کا بھی کوئی جواب نہیں آیا۔
جسٹس عمر عطا بندیال کا کہنا تھا کہ لوگ کہتے ہیں، وہ قانون سے بالاتر ہیں لیکن لوگ من پسند ججوں سے فیصلے کرانا چاہتے ہیں۔
