اسلام آباد : حکومتی اتحاد نے الیکشن ملتوی کیس میں فریق بننے کا فیصلہ کرلیا ، جس کے بعد وفاقی حکومت کے اعلیٰ سطح وفد کی آج سپریم کورٹ میں پیشی کاامکان ہے۔
تفصیلات کے مطابق پنجاب اورخیبرپختونخوا انتخابات موخرکرنے کے فیصلے سے متعلق کیس میں وفاقی حکومت کے اعلیٰ سطح وفد کی آج سپریم کورٹ میں پیشی کا امکان ہے۔
ذرائع نے بتایا کہ حکومتی اتحاد نے الیکشن ملتوی کیس میں فریق بننے کا فیصلہ کرلیا ، ن لیگ، پیپلز پارٹی اور جے یو آئی کے وزرا وفد کا حصہ ہوں گے، سپریم کورٹ میں کیس کی سماعت 11بجے شروع ہوگی۔
ذرائع نے بتایا کہ سپریم کورٹ میں زیر سماعت کیس پر وزیراعظم کی مشاورت جاری ہے۔
خیال رہے سپریم کورٹ میں پنجاب اور خیبرپختونخوا میں انتخابات ملتوی کرنے کے فیصلے کے خلاف درخواست پر سماعت آج پھر ہوگی، چیف جسٹس پاکستان عمر عطا بندیال کی سربراہی میں پانچ رکنی بینچ سماعت کرے گا۔
گذشتہ روز چیف جسٹس نےانتخابات کے لیے ججوں کی تنخواہوں میں کٹوتی کی تجویز دی تھی ، چیف جسٹس نےکہا تھا کہ الیکشن کمیشن کا فیصلہ جلدی بازی میں لکھا گیا، الیکشن کمیشن کےپاس الیکشن تاریخ میں توسیع کی کوئی اتھارٹی یا قانون نہیں۔
بعد ازاں حکومت نے عدالتی اصلاحات کے لیے فوری قانون سازی کا فیصلہ کیا تھا ، جس کے بعد چیف جسٹس آف پاکستان ازخود نوٹس کا اختیار تنہا استعمال نہیں کر سکیں گے۔
