پاکستان تحریک انصاف کے ترجمان رؤف حسن نے دعویٰ کیا ہے کہ پی ٹی آئی نے قومی اسمبلی کی 177 نشستیں جیتیں مگر 92 پر کامیابی دی گئی۔
اے آر وائی نیوز کے مطابق پاکستان تحریک انصاف کے ترجمان رؤف حسن نے پارٹی کے دیگر رہنماؤں کے ہمراہ اسلام آباد میں پریس کانفرنس کرتے ہوئے کہا ہے کہ پی ٹی آئی کے امیدواروں کیخلاف الیکشن میں فراڈ کیا گیا۔ ہم نے قومی اسمبلی کی 177 نشستیں جیتیں مگر 92 پر کامیابی دی گئی۔
ان کا کہنا تھا کہ 8 فروری کو ہونے والے الیکشن پاکستان کی تاریخ کے سب سے زیادہ دھاندلی شدہ انتخابات تھے جو اپنے دھاندلی کی وجہ سے ہمیشہ یاد رکھے جائیں گے۔ فارم 45 کے مطابق جو آزاد امید وار جیتے تھے، وہ فارم 47 میں ہرادیئے گئے۔ قومی اور صوبائی اسمبلی میں جو ووٹ ڈالے گئے ان میں بہت بڑا فرق ہے۔
رؤف حسن نے کہا کہ ہم نے 46 سیٹوں پر انتخابی عذر داری کی درخواستیں دی ہیں جب کہ ان 29 سیٹوں سے متعلق ڈیٹا اکٹھا کیا جا رہا ہے جہاں سے پی ٹی اائی جیتی ہے۔
