پاکستان پیپلز پارٹی کی رہنما شیری رحمان نے کہا ہے کہ لاہور سے بھی بلاول بھٹو کی کھلی لیڈ تھی سب چینلز چلا رہے تھے، بند کمروں میں سب کام ہوا ہے۔
تفصیلات کے مطابق پاکستان پیپلز پارٹی کی رہنما شیری رحمان نے پریس کانفرنس میں کہا کہ لاہور میں نتیجہ اچانک تبدیل ہوا ہے، جادو تو بہت ساری سیٹوں پر چل رہا ہوگا لیکن یہاں بھی ہوا، ایپ بند کر دی گئی تو ہم فوری طور پر الیکشن کمیشن پہنچے، الیکشن کمیشن سے کہا تعطل آنے سے جمہوری پروسس رک جائے گا۔
شیری رحمان نے کہا کہ جب انٹرنیٹ بند ہوگیا تو پریشانی ہونے لگی، لاہور میں بلاول بھٹو کے ووٹ غائب کر لئے گئے، ہم پٹیشن لے کر لاہور ہائیکورٹ گئے، لیکن دروازہ نہیں کھلا، ہمیں دروازہ کھولنا اور کھلوانا بھی آتا ہے۔
شیری رحمان نے کہا کہ مجھے تو کوئی سیکیورٹی صورتحال نظر نہیں آئی جو انٹرنیٹ بند کیا گیا، جب تک رزلٹ فائنل نہیں ہوئے نیٹ نہیں کھلا، رزلٹ ہم سے کیوں چھپائے جارہے تھے؟ این اے 127 سے بلاول بھٹو کی کھلی لیڈ تھی سب چینلز چلا رہے تھے، بند کمروں میں سب کچھ ہوا ہے۔
انہوں نے کہا کہ لاہور کسی کی جاگیر نہیں پورا پاکستان ووٹروں کیلئے کھلا ہونا چاہئے، کل جو یہاں پر ہوا وہ دیکھ کر مجھےدھچکا لگا ہے، ہم اداروں کا ہمیشہ احترام کرتے ہیں، بلاول بھٹو نے بھی کہا کوشش ہے ملک میں استحکام رہے، گزارش ہے کہ رزلٹ میں تاخیر نہ ہو۔
انہوں نے مزید کہا کہ ہمارے خدشات دور کردیں بتادیں کہ یہ تبدیلی ہوئی ہے، بہت سارے رزلٹ جو ٹائم پر آئے انہیں ہم نے قبول کیا ہے۔
