فافن کی رپورٹ میں عام انتخابات 2024 سے متعلق انکشاف کیا گیا ہے کہ ان انتخابات میں بڑی سیاسی جماعتوں نے ووٹ بینک برقرار رکھا۔
تفصیلات کے مطابق فافن رپورٹ میں کہا گیا ہے کہ بڑی سیاسی جماعتوں نے 2024 کے انتخابات میں مجموعی اورانفرادی ووٹ بینک دونوں برقراررکھا، پی ٹی آئی، ن لیگ اور پی پی پی نے قومی اسمبلی کیلئے 68 فیصد ووٹ حاصل کیے۔
فافن کے مطابق پی ٹی آئی، ن لیگ اور پی پی پی نے صوبائی اسمبلیوں کیلئے 62 فیصد ووٹ حاصل کیے، الیکشن 2018 میں پی ٹی آئی، ن لیگ، پی پی پی نے قومی اسمبلی کیلئے 69 فیصد ووٹ لیے تھے۔
الیکشن 2018 میں پی ٹی آئی، ن لیگ، پیپلزپارٹی نے صوبائی اسمبلیوں میں 61 فیصد ووٹ لیے تھے، الیکشن 2013 میں تینوں جماعتوں کے قومی اسمبلی میں 65، صوبائی اسمبلیوں میں 58 فیصد ووٹ تھے
رپورٹ میں کہا گیا ہے کہ کسی سرکردہ پارٹی نے اپنے گڑھ میں قطعی اکثریت حاصل نہیں کی، کےپی میں پی ٹی آئی نے قومی اسمبلی کے مقابلوں میں 45 فیصد ووٹ حاصل کیے۔
فافن کے مطابق کےپی میں قومی اسمبلی کیلئے 55 فیصد ووٹ دیگر جماعتوں میں تقسیم ہوئے، جے یو آئی 16 فیصد، ن لیگ 10 فیصد اور اے این پی نے7 فیصد ووٹ حاصل کیے، آزاد امیدواروں نے 7 فیصد جبکہ دیگر جماعتوں نے مجموعی طور پر 15 فیصد ووٹ لیے
پیپلزپارٹی نے سندھ میں قومی ووٹوں کا 46 فیصد حاصل کیا، جی ڈی اے 12 فیصد، پی ٹی آئی اور آزاد امیدواروں نے 9 فیصد ووٹ لیے، ایم کیو ایم نے 8 فیصد، دیگر چھوٹی جماعتوں نے مجموعی طور پر 16 فیصد ووٹ لیے۔
فافن رپورٹ میں بتایا گیا کہ بلوچستان میں ووٹ بینک کا رحجان سب سے زیادہ منقسم رہا، بلوچستان میں علاقائی جماعتوں نے 35 فیصد اور آزاد امیدواروں نے 16 فیصد ووٹ لیے۔
بلوچستان میں جے یو آئی 16 فیصد، ن لیگ 14 فیصد، پی پی 10 فیصد، پی ٹی آئی نے 7 فیصد ووٹ لیے، پی ٹی آئی، ن لیگ، پی پی نے ووٹ شیئرز کے مقابلے میں زیادہ سیٹیں جیتیں۔
