کراچی: صوبہ سندھ کے دارالحکومت کراچی میں اتوار کے روز کے الیکٹرک نے بجلی کی مینٹیننس کے نام پر 15 گھنٹے سے زائد بجلی بند کیے رکھی، وزیر اعلیٰ سندھ نے کے الیکٹرک کو لاک ڈاؤن میں بجلی بند نہ کرنے کی ہدایت کی تھی جس کی حسب معمول دھجیاں اڑا دی گئیں۔
تفصیلات کے مطابق شہر قائد میں لاک ڈاؤن کے باوجود کراچی میں بجلی کی لوڈ شیڈنگ جاری ہے، اتوار کے روز مینٹیننس کے نام پر شہر کے مختلف علاقوں میں 15 گھنٹے سے زائد بجلی بند رکھی گئی۔
کے الیکٹرک سے جاری شدہ مسیج کے مطابق صبح 8 سے رات 9 بجے تک بجلی بند رہے گی تاہم شہریوں کے مطابق صبح 8 بجے سے بند بجلی رات 11 بجے تک بھی بحال نہ ہوسکی۔
کراچی کے مختلف علاقوں کورنگی، اورنگی، سرجانی ٹاؤن، لیاقت آباد، اسکیم 33، گلشن معمار، کیماڑی، نارتھ ناظم آباد، قائد آباد اور ملیر میں بھی تاحال بجلی کی آنکھ مچولی کا سلسلہ جاری ہے۔
یاد رہے کہ وزیر اعلیٰ سندھ سید مراد علی شاہ نے کے الیکٹرک کو لاک ڈاؤن میں بجلی بند نہ کرنے کی ہدایت کی تھی۔
دوسری جانب ترجمان کے الیکٹرک کا کہنا ہے کہ بجلی کی بہتر فراہمی کے لیے مینٹیننس شٹ ڈاؤن ضروری ہے، بجلی چوری اور نقصانات والے علاقوں میں قواعد و ضوابط کے مطابق لوڈ شیڈنگ کی جاتی ہے۔
ترجمان کے مطابق کورنگی، اورنگی، سرجانی ٹاؤن، لیاقت آباد اور لیاری میں بجلی کی فراہمی جاری ہے، شہری علاقائی فالٹس کی درستگی کے لیے 118 یا کے الیکٹرک کے سوشل میڈیا پلیٹ فارمز پر رابطہ کریں۔
