کے الیکٹرک کے ترجمان نے کہا کہ کراچی میں منگل کو مون سون کی پہلی بارش کے دوران شہر کو بجلی کی فراہمی مستحکم رہی۔
ترجمان کا کہنا تھا کہ یوٹیلیٹی کا عملہ بارش کے دوران کسی بھی صورتحال سے نمٹنے کے لیے مکمل طور پر مستعد رہا، شہر کو بجلی کی فراہمی کے لیے نصب کیے گئے 2100 فیڈرز کے نیٹ ورک میں سے 1800 فیڈرز کے ذریعے کے۔ الیکٹرک نے بجلی کی بلاتعطل فراہمی کو یقینی بنایا۔
نشیبی علاقوں اور کنڈوں کی بہتات والے علاقوں میں حفاظتی نقطہ نگاہ سے بجلی کی فراہمی عارضی طور پر معطل کی گئی جس کو مقامی ٹیموں کی جانب سے کلیئرنس ملنے کے بعد بحال کر دیا گیا۔
کے الیکٹر ترجمان نے بتایا کہ کے الیکٹرک کی ٹیمیں حکومت سندھ کے اہم محکموں، محکمہ موسمیات اور شہری انتظامیہ کے ساتھ رابطے میں رہیں تاکہ کسی بھی صورتحال سے فوری نمٹا جاسکے، رواں سال مون سون سیزن کے دوران اوسط سے زائد بارشوں کی پیش گوئی کی گئی ہے۔
ترجمان کے الیکٹرک نے شہریوں پر زور دیا کہ وہ اپنی اور آس پاس کے لوگوں کی حفاظت کو یقینی بنائیں، باہر نکلتے وقت ہمیشہ بجلی کی تمام تنصیبات سے محفوظ فاصلہ برقرار رکھیں۔
گھروں کے اندر بھی بجلی کے آلات خاص طور پر پانی کی موٹر کو گیلے ہاتھوں یا پیروں کے ساتھ استعمال کرنے سے گریز کریں، جنریٹر کو بیک اپ سپلائی کے طور پر استعمال کرنے والے صارفین سے خاص طور سے التماس ہے کہ وہ جنریٹر کو مناسب وینٹیلیشن کے ساتھ اونچی اور خشک جگہ پر رکھیں۔
ترجمان نے کہا کہ صارفین کسی بھی شکایت کی صورت میں کے الیکٹرک کے سوشل میڈیا پلیٹ فارمز، کے ای لائیو ایپ اور خودکار واٹس اَیپ پورٹل استعمال کرسکتے ہیں، بجلی کی صورتحال سے متعلق ایمرجنسی شکایات کیلئے کال سینٹر118 سے بھی رجوع کیا جاسکتا ہے۔
