فیصل آباد / ملتان : پنجاب میں فیسکو اور میسکو کی ٹیموں نے بجلی چوری میں ملوث افراد کیخلاف مؤثر کاروائیاں کرتے ہوئے دو اہم سیاسی شخصیات سمیت294 فراد کو پکڑ لیا۔
پیپلزکالونی میں سابق چیف میونسپل کارپوریشن زبیرنت کی رہائش گاہ پر میٹر انسپکٹر کاشف ظہیر کی قیادت میں ٹاسک فورس نے چھاپہ مارا۔
زبیرنت کی سرکاری رہائش گاہ پر بجلی کے براہ راست تار لگا رکھے تھے جس کیخلاف کیخلاف بجلی چوری کا مقدمہ درج کرلیا گیا ہے، یاد رہے کہ زبیر نت کرپشن کے متعدد مقدمات میں ملوث ہونے کی وجہ سے 5ماہ سے عہدے سے معطل ہے۔
دوسری کارروائی میں ملتان میں میسکو کے عملے نے بجلی چوروں کیخلاف بڑا کریک ڈاؤن کیا، اس دوران ملتان کی 2اہم سیاسی شخصیات سمیت293 افراد کو بجلی چوری کرتے ہوئے پکڑ لیا گیا۔
اس حوالے ترجمان میپکو کا کہنا ہے کہ مظفرگڑھ سے سابق ایم پی اے میاں علم دار قریشی کی بجلی چوری پکڑی گئی، سابق ایم پی اے کے زیر استعمال گھریلو میٹر بوگس پایا گیا، ان کیخلاف مقدمہ کے لئے درخواست متعلقہ تھانہ کو ارسال کردی گئی ہے۔ علاوہ ازیں خانیوال سے سیاسی رہنما رانا عرفان محمود بجلی چوری کرتے پکڑے گئے۔
اس کے علاوہ دیگر کاروائیوں میں ڈائریکٹ سپلائی استعمال کرنے والے 4 افراد کو ملتان پولیس نے گرفتار کرلیا، اب تک ملتان میں 47،ڈی جی خان میں 47، وہاڑی میں 22،بہاولپور سے26بجلی چور پکڑے گئے۔
اس کے علاوہ ساہیوال 22،رحیم یار خان 30،مظفرگڑھ43،بہاولنگر 17 ،خانیوال سے14 بجلی چور رنگے ہاتھوں پکڑے گئے۔ بجلی چوروں کو مجموعی طور پر ایک کروڑ 66 لاکھ 94 ہزار روپے جرمانہ عائد کیا گیا۔
ترجمان میپکو کے مطابق 285 بجلی چوروں کیخلاف مقدمات کے اندراج کے لئے درخواستیں متعقہ تھانوں کو بھیجی گئیں جس میں تاحال 18 بجلی چوروں کیخلاف مقدمات درج ہوگئے ہیں۔
