کراچی : الیکشن کمیشن کے فیصلے کے بعد ایم کیوایم رابطہ کمیٹی کا ہنگامی اجلاس کچھ دیر میں ہوگا، جس میں سیاسی صورتحال ،سندھ کابینہ کے حلقہ بندی سے متعلق فیصلوں پر غور ہوگا۔
تفصیلات کے مطابق ایم کیو ایم نے رابطہ کمیٹی کا ہنگامی اجلاس تین بجے طلب کرلیا، اجلاس میں ڈاکٹر فاروق ستار ، مصطفی کمال، انیس قائم خانی بھی شریک ہوں گے۔
ذرائع کا کہنا ہے کہ سیاسی صورتحال ،سندھ کابینہ کے حلقہ بندی سے متعلق فیصلوں پر غور ہوگا اور گذشتہ رات وزیراعلیٰ سندھ سے ہونے والی ملاقات پر بھی گفتگو ہوگی۔
ذرائع نے بتایا کہ اجلاس میں مستقبل ، تنظیمی معاملات سمیت دیگرامور پر تبادلہ خیال ہوگا۔
گذشتہ روز ایم کیوایم کے مطالبے پر سندھ حکومت نے بلدیاتی حلقہ بندیوں کا نوٹیفکیشن واپس لے لیا تھا اور کہا کراچی اور حیدرآبادمیں پندرہ جنوری کو بلدیاتی الیکشن نہ کرانے کااعلان کیا تھا۔
بعد ازاں آج الیکشن کمیشن میں ہنگامی اجلاس ہوا ، جس میں سندھ حکومت کی درخواست مسترد کردی اور کہا کہ کراچی اور حیدرآباد کے بلدیاتی انتخابات پندرہ جنوری کو ہی ہوں گے۔
الیکشن کمیشن نے وزارت داخلہ کو انتہائی حساس پولنگ اسٹیشنز پر فوج اور رینجرز کی تعیناتی یقینی بنانے کی ہدایت کردی۔
