مانچسٹر: انگلینڈ کرکٹ بورڈ(ای سی بی) نے ویمن ٹیم کے پہلی بار پاکستان کے دورے کا اعلان کردیا۔
تفصیلات کے مطابق انگلینڈ ویمن ٹیم رواں برس اکتوبر میں پاکستان کا دورہ کرے گی، یہ انگلش ویمن کھلاڑیوں کا پاکستان کا پہلا دور ہوگا، قومی اور حریف ٹیموں کے درمیان 2 ٹی ٹونٹی اور 3 ون ڈے میچز کھیلے جائیں گے۔
انگلش کرکٹ بورڈ کا کہنا ہے کہ ٹیم سارے میچز نیشنل اسٹیڈیم کراچی میں ہی کھیلے گی، ویمن ٹیم انگلینڈ مین ٹیم کے ساتھ روانہ ہوگی۔ مینجنگ ڈائیریکٹر ویمن کرکٹ بورڈ نے کہا ہے کہ ہمیں دورے کا اعلان کرنے پر بہت خوشی ہے۔
پاکستان کرکٹ بورڈ (پی سی بی) کے چیف ایگزیکٹو وسیم خان نے بھی خوشی کا اظہار کرتے ہوئے کہا کہ انگلینڈ ویمن کرکٹ ٹیم کا پہلا دورہ پاکستان ایک بڑا اعلان ہے۔
ان کا مزید کہنا تھا کہ یہ بڑا اعلان خواتین کرکٹرز اور کرکٹ کے لیے خوش آئند ہے۔
خیال رہے کہ انگلش کھلاڑیوں کی آمد کے سلسلے میں تیاریاں بھی مختلف مراحل میں جاری ہیں۔ ملک میں آہستہ آہستہ عالمی کرکٹ کے سارے دروازے کھل رہے ہیں۔
