برسلز: یورپی یونین کمیشن نے ویکسین کارڈ یا ویکسین پاسپورٹ کے استعمال کا عندیہ دے دیا، اس سلسلے میں ایک مسودہ قانون 17 مارچ کو پیش کیے جانے کی توقع ہے۔
تفصیلات کے مطابق یورپی یونین کا کہنا ہے کہ سیر و سیاحت کے فروغ کے سلسلے میں استعمال کیے جانے والے ویکسین کارڈز یونین کی جانب سے منظوری دی گئی ویکسین کے لیے لاگو ہوں گے۔
یورپی یونین کمیشن کی رکن یلووا جوہانسن نے ویکسین کارڈ کے سلسلے میں میڈیا سے گفتگو میں کہا کہ یورپی یونین کمیشن کاروبار اور سیر و سیاحت کے سلسلے میں آمد و رفت میں آسانیاں لانے کے لیے ویکسین کارڈ یا ویکسین پاسپورٹ کے حوالے سے مسودہ قانون آئندہ ہفتے پیش کرے گا۔
ویکسین پاسپورٹ: یورپی ممالک آپس میں الجھ پڑے
یورپی یونین کمیشن کے مسودہ قانون کو 17 مارچ کو سامنے لائے جانے کی توقع کی جا رہی ہے، اس بل پر یورپی یونین کونسل اور یورپی پارلیمنٹ کی منظوری لازمی ہے۔
یورپی یونین نے اب تک استعمال کیے جانے والے بائیو این ٹیک، فائزر، موڈرنا اور آسٹرا زینیکا کمپنیوں کی ویکسینز کو مذکورہ فہرست میں جگہ دی ہے۔
جانسن اینڈ جانسن کی ویکسین نے گزشتہ روز منظوری لے لی تھی، تاہم اس کی تقسیم کا عمل اپریل میں متوقع ہے۔
