The news is by your side.

Advertisement

یورپ میں ملازمتیں حاصل کرنے کا زبردست موقع، روزگار اسکیم متعارف

کرونا وبا نے یورپ کی نوجوان آبادی کو بھی شدید متاثر کیا ہے، تاہم یورپی یونین نے اس کا ممکنہ حل نکال لیا ہے۔

میڈیا رپورٹ کے مطابق یورپی یونین ‘آلما‘ نامی روزگار کی ایک نئی اسکیم تیار کر رہی ہے ،اس اسکیم کے تحت یورپی یونین کے رکن ممالک کے نوجوان شہری بیرون ملک موجود ملازمت کے مواقعوں سے مستفید ہوسکیں گے۔

آلما ا سکیم کے ذریعے ایسے نوجوانوں کی مدد کی جائے گی جو تعلیم، تربیت یا کسی قسم کے روزگار سے وابستہ نہیں ہیں، انہیں کام کا تجربہ حاصل کرنے کیلئے یورپ کے کسی بھی ملک بھیجا جائے گا۔

اس پروگرام میں شامل کیے جانے والے نوجوان افراد کو بیرون ملک سفر کرنے کے ساتھ ساتھ رہائش، انشورنس اور بنیادی اخراجات کے لیے وظیفہ بھی ملے گا۔ ان کی ہر سطح پر پیشہ ورانہ رہنمائی بھی کی جائے گی۔

یورپین کمیشن کے مطابق اس اسکیم میں ایسے لوگوں پر توجہ مرکوز کی جائے گی جو ملازمت تلاش کر رہے ہیں، جسمانی طور پر معذور ہیں، جن کے پاس ناکافی پیشہ ورانہ تجربہ ہے یا پھر وہ ترکِ وطن ہیں۔

اسکیم کے تحت شرکا کے تمام اخراجات یورپی یونین ادا کرے گا، لہٰذا کمپنیاں اِن ملازمین کو تنخواہ دینے یا نہ دینے کا خود ہی فیصلہ کر سکتی ہیں۔ اس دوران رکن ممالک کی طرف سے وظیفے کی پشکش بھی کی جا سکتی ہے۔

یہ بھی پڑھیں: سفری سہولیات: برطانیہ نے پاکستانی مسافروں کو بڑی خوشخبری سنا دی

اسکیم سے متعلق یورپین کمیشن کی ترجمان فیئرلے نوئٹس نے کہا کہ اس اسیکم کا مقصد نوجوان افراد کو اپنی مہارت، معلومات اور تجربہ بہتر بنانے کا موقع فراہم کرنا ہے، اس طرح وہ یورپ بھر میں اپنے نئے روابط بھی قائم کرسکیں گے۔

یہ اسکیم فی الحال حتمی طور پر تیار نہیں ہے لیکن مختلف کمپنیاں ابھی سے ہی اس میں دلچسپی دکھا سکتی ہیں، آلما اسکیم کے پہلے سال کے لیے پندرہ ملین یورو کی رقم مختص کی گئی ہے۔

ماہرین کا کہنا ہے کہ نوجوانوں کیلئے بیرون ملک تجربہ حاصل کرنا یقیناﹰ فائدہ مند ثابت ہوگا کیونکہ ان کی سی وی میں یہ اضافی بات ہوگی اور مختلف نظام میں تجربہ حاصل کرنے سے ذہن بھی کھلتا ہے۔

تاہم یورپین یوتھ فورم اس سکیم کے اجرا کی مخالفت کرتے ہوئے کہا ہے کہ آلما کو چاہیئے کہ وہ تمام نوجوانوں کیلئے روزگار کی منڈی میں مساوی مواقع کی جانب بڑھنا چاہیے، جس میں کسی قسم کا بلا معاوضہ کام شامل نہ ہو۔

Comments

یہ بھی پڑھیں